Buqaralyq sport: Aýladaǵy ınfraqurylymdy damytýǵa ekpin qoıylady

NUR-SULTAN. QazAqparat – 2025 jylǵa qaraı elimizde qarapaıym sport nysandarynyń sany 30 myńǵa deıin jetkizilmek. Bul týraly QR Mádenıet jáne sport mınıstri Aqtoty Raıymqulova málim etti, dep habarlaıdy QazAqparat tilshisi.

«Buqaralyq sportty damytýda sporttyq ınfraqurylymynyń bolýy óte manyzdy. Búginde elimizde 23 myń qarapaıym sport nysany jumys qyzmet etýde. Jergilikti atqarýshy organdardyń esepteýlerine sáıkes, qarapaıym sport qurylysyn (aýla trenajerleri, júgirý jolaqtary, vorkaýt alańdar) salý qajettiligi jylyna orta eseppen 1 myń 100 nysandy qurady. Osy oraıda 2025 jylǵa qaraı qurylystardyń jalpy sany 30 myńǵa deıin jetkizilmek», - dedi mınıstr Ortalyq kommýnıkatsııalar qyzmetindegi onlaın baspasóz máslıhatynda.

Halyqty buqaralyq sportpen aınalysýǵa tartýdyń mańyzdy komponentteriniń biri - salaýatty ómir saltyn keńinen nasıhattaý. Osy oraıda televızııalyq sıýjetter, fılmder, beınerolıkter, aktsııalar, master-klastar, fleshmobtar, ashyq esik kúnderi, sondaı-aq ártúrli baıqaýlar ótkizý qarastyrylǵan.

Aıta keteıik, Dene shynyqtyrý jáne buqaralyq sportty damytý jónindegi 2020-2025 jylǵa arnalǵan keshendi jospary ázirlendi. Bul josparda múddeli memlekettik organdardyń, jergilikti atqarýshy organdardyń usynystary tolyq eskerilip, QR Premer-Mınıstrimen bekitildi.

Budan buryn habarlanǵandaı, dene shynyqtyrý muǵalimderi sabaqtan tys sport sabaqtaryn júrgizgeni úshin bazalyq laýazymdyq jalaqydan 100 paıyz mólsherinde qosymsha aqy alýy múmkin.