Buqar jyraýdyń 350 jyldyǵyna daıyndyq bastaldy

QARAǴANDY. QazAqparat - Qaraǵandy oblysynda ataqty oıshyl Buqar jyraý Qalqamanulynyń 350 jyldyǵyna arnalǵan merekelik sharalarǵa daıyndyq bastaldy, dep habarlaıdy óńir ákimdiginiń resmı saıty.

Buqar jyraý aýdanynyń ákimi Shaǵýrashıd Mamalınov mereıtoıdy uıymdastyrý boıynsha úshinshi otyrys uıymdastyrdy. 

Otyrysqa «Buqar jyraý Qalqamanuly» atyndaǵy qoǵamdyq qordyń jáne aýdannyń ardagerler uıymynyń tóraǵasy Tóken Arbabaev qatysty. Aýdandyq bólimderdiń jetekshileri merekelik sharaǵa daıyndyq barysy týraly baıandady. 

Mereıtoılyq logotıptiń úsh nusqasy usynyldy. Olardyń arasynan komıssııa músheleri óner tanýshy, Botaqara kentiniń balalar óner mektebinde ustaz bolyp qyzmet atqaratyn Amantaı Ákishevtiń jumysyn tańdady. Negizge alynǵan logotıpte Buqar jyraýdyń portreti, «Rýhanı jańǵyrý» emblemasy, sondaı-aq Táýke hannyń el bıleý kezeńinde Qazaq handyǵynda qabyldanǵan «Jeti jarǵydaǵy» zań jıyntyqtaryn bildiretin jeti belgi beınelengen. 

«Merekelik sharany atap ótý 18 tamyzda ótedi dep josparlanyp otyr. Otyrys barysynda sharany 17 tamyzda Buqar jyraý mavzoleıinde bastaý usynysy quptaldy», - dep málimdedi Buqar jyraý aýdany ákiminiń baspasóz qyzmeti. 
Komıssııa ıppodromnyń, kıiz úıler qalashyǵynyń jáne sahnanyń ornalasý jerin talqylady. Buqar jyraý týraly 20 mınýttyq fılm men «Saryarqa» oblystyq telearnasynyń efırinde kórsetiletin qysqa metrajdy beınerolıkter túsirý josparlanyp otyr.

Botaqara ákiminiń orynbasary Almas Aıapbergenov kentti abattandyrý boıynsha esep berdi. 

- Buqar jyraýdyń mereıtoıy - ol bizdiń aýdan úshin óte mańyzdy shara. Daıyndyqty halyqpen kelise otyryp júrgizgen jón, - dep atap ótti aýdan basshysy.