Býharestte Qazaqstan táýelsizdiginiń 30 jyldyǵyna arnalǵan otyrys ótti
Bıyl Qazaqstan táýelsizdiginiń 30 jyldyǵyna oraı Qazaqstan Elshiligi Rýmynııa Parlamenti depýtattary men Syrtqy ister mınıstrligi basshylyǵynyń, sondaı-aq eliniń ǵylymı jáne sarapshylyq ortalary, bıznes-qoǵamdastyqtary men BAQ ókilderiniń qatysýymen onlaın formatta dóńgelek ústel uıymdastyrdy.
Óz sózinde Elshi Nurbah Rústemov bul mereıtoı barsha Qazaqstan halqy úshin mańyzdy ekenin aıtyp, Elbasy Nursultan Nazarbaevtyń zamanaýı memleket qurýdaǵy basty rólin atap ótti.
Sonymen birge, ol Prezıdent Qasym-Jomart Toqaevtyń Qazaqstandaǵy jan-jaqty saıası reformalardy júzege asyrý jónindegi bastamasynyń negizgi rólin atap ótti. Atap aıtqanda, saıası partııalar qurý úshin tirkeý kedergisin tómendetý, partııalyq tizimderge áıelder men jastar úshin 30 paıyzdyq kvota engizý, Parlament Májilisinde oryn alý shegin 7%-dan 5% - ǵa deıin tómendetý, jala jabýdy dekrımınalızatsııalaý jáne taǵy basqalary.
Óz kezeginde, dóńgelek ústelge qatysýshylar Qazaqstandy aıtýly mereıtoımen quttyqtap, halqymyzǵa tabys pen baq-bereke tiledi.
Rýmynııanyń burynǵy Prezıdenti Emıl Konstantıneský Qazaqstanǵa alǵashqy saparyn jáne Elbasymen kezdesýin jyly lebizben eske aldy, sondaı-aq tarıhı ólshem boıynsha qysqa merzim ishinde bizdiń memleketimizdiń damýyndaǵy qol jetkizilgen progresti joǵary baǵalady.
Rýmynııa Syrtqy ister mınıstrliginiń Memlekettik hatshysy Dan Nekýlaeský Qazaqstan Rýmynııanyń Ortalyq Azııadaǵy negizgi áriptesi bolyp tabylatynyn jáne belsendi saıası dıalog ornatylǵanyn atap ótti. Sonymen qatar, rýmyn dıplomaty Ekonomıkalyq jáne ǵylymı-tehnıkalyq yntymaqtastyq jónindegi Úkimetaralyq komıssııa qyzmeti aıasynda tıimdi ózara is-qımyldyń mańyzdylyǵyn atap ótti (sońǵy otyrysy 2020 jyldyń qazan aıynda ótti).
Rýmynııa Zańnamalyq keńesiniń prezıdenti Florın Iordake Qazaqstanda júrgizilip jatqan qoǵamdy demokratııalandyrý jáne jańǵyrtý jónindegi reformalardy qoldady.
Parlamenttiń syrtqy saıasat jónindegi komıtetiniń tóraǵasy Bıro Rozalııa, Eýropa Keńesi Parlamenttik Assambleıasy Komıssııasynyń vıtse-prezıdenti, parlament depýtaty Tıtýs Korlıatsan jáne Rýmynııa Parlamentiniń depýtaty Mıhaıl Albıshtıaný Qazaqstannyń Ortalyq Azııa óńirindegi rólin joǵary baǵalap, elimizdiń halyqaralyq qoǵamdastyqty damytýǵa qosqan laıyqty úlesin atap ótti. Sonymen qatar, depýtattar Qazaqstanǵa ólim jazasyn joıýǵa baǵyttalǵan Azamattyq jáne saıası quqyqtar týraly halyqaralyq paktige ekinshi Fakýltatıvtik hattamanyń ratıfıkatsııalanýyna baılanysty qoldaý bildirdi. Sondaı-aq, olar ekijaqty parlamentaralyq dıalogty jańdandyrýǵa shaqyrdy.
«QMG Interneshnl» Bas dırektory Beıimbet Shaıahmetov qazaqstandyq kompanııanyń tabysty qyzmeti eki el arasyndaǵy jemisti ekonomıkalyq ózara is-qımyldyń aıǵaǵy bolyp tabylatynyn atap ótti.
Býharest Saýda-ónerkásip palatasynyń vıtse-prezıdenti ıÝlıý Stokloza jáne Qazaqstannyń Rýmynııadaǵy Qurmetti konsýly Shtefan Gadola elderimiz arasyndaǵy saýda-ekonomıkalyq jáne ınvestıtsııalyq yntymaqtastyqtyń joǵary áleýetin atap ótti.
Býharest polıtehnıkalyq ýnıversıtetiniń rektory Mıhnıa Kostoıý Qazaqstan men Rýmynııa joǵary oqý oryndary arasyndaǵy belsendi yntymaqtastyqqa qanaǵattanýshylyq bildirdi. Sonymen qatar, E.A.Bóketov atyndaǵy Qaraǵandy memlekettik ýnıversıtetinde rýmyn tili men mádenıeti zertteletinine nazar aýdardy.
Dóńgelek ústel sońynda qatysýshylar Qazaqstan-Rýmynııa qarym-qatynastarynyń jaı-kúıi men damý keleshegi týraly pikir almasty.
Atap aıtqanda, bıyl Qazaqstan táýelsizdiginiń 30 jyldyǵyna oraı ótkizý josparlanǵan ekijaqty is-sharalardyń kún tártibin talqylady (Qurmanǵazy eskertkishiniń ashylýy, Qazaqstannyń kıno jáne mádenıet kúnderin ótkizý, bıznes-forým, ǵylymı-praktıkalyq konferentsııa uıymdastyrý jáne t.b.).