Búginginiń batyry: oqýshy Aqan Ákimjanov balkondaǵy balany qalaı qutqarǵanyn aıtty

<p>ASTANA. KAZINFORM &ndash; Astanadaǵy turǵyn úı keshenderiniń birinde №31 mektep-gımnazııanyń 7 &laquo;d&raquo; synyp oqýshysy Aqan Ákimjanov qaıǵyly jaǵdaıdyń aldyn aldy. 20 mamyrda tórtinshi qabatta ornalasqan páterdiń balkonynda ilinip turǵan 5 jasar balany qutqaryp qaldy. Beıbit kúnniń batyryna aınalyp shyǵa kelgen Aqan <a href="https://kaz.inform.kz/lenta/" target="_blank" rel="noopener">Kazinform</a> tilshisine shaǵyn suhbat berdi.&nbsp;</p>

Sol kúni Aqan dostarymen birge aýlada oınap júrip, 4 qabattyń balkonynda ilinip turǵan balany kóredi. Keıin belgili bolǵandaı, 5 jasar bala bul úıge qonaqqa kelip, anasyn izdeı bastaǵan. 

– Aqan, qıyndyqqa tap bolǵan kishkentaı balany kórgen kezde ne oıladyń? 

– Oılanbastan sómkemdi tastap, oǵan kómekke júgirdim. Lıftimen kóterilip bara jatqanda qalaı qutqaratynymdy oılastyra bastadym. Bir jaǵynan úlgermeımin be dep te qoryqtym. Balkonǵa jedel jetip, balany qolynan tartyp, kóterip aldym. Menimen birge bolǵan dostarym da kómekteskisi keldi, biraq olar qulap ketken jaǵdaıda qutqarý amaldaryn jasaý úshin aýlada qaldy. 

– Balany qutqaryp alǵannan keıin onymen sóılese aldyń ba? 

– Balany lıftimen túsirgenimde ol jylaı bastady. Ony tez alyp ketti, sondyqtan da balaqaımen tanysýǵa ýaqytym bolmady. Keıin ata-anasy kelip, alǵysyn aıtty. Barlyǵy jaqsy aıaqtalǵanyna qýanyshtymyn. Meniń ornymda bolǵan kez kelgen adam kómekke umtylýshy edi. 

– Bul jaǵdaıdan qandaı sabaq aldyń? 

– Siz ózińizge, jaqyndaryńyzǵa nemese sizge múldem bóten adamdarǵa áp-sátte ne bolatynyn eshqashan bilmeısiz. Eger adam qıyndyqqa tap bolǵanda oǵan kómektesýge múmkindigińiz bolsa, qol ushyn sozý kerek. Meniń kishkentaı baýyrym bar. Oǵan úlgi bolǵym keledi. Ómirde kez kelgen jaǵdaı bolýy múmkin. Jaqyn adamdarymnyń biri qıyndyqqa tap bolsa, janyndaǵy adamdar da mindetti túrde kómektesedi dep úmittenemin. 

– Sizdiń dostaryńyz, synyptastaryńyz bolǵan oqıǵa sizden surady ma? Olar sizge ne aıtty?  

– Árıne, surady. Meni maqtan tutatyndaryn jetkizdi. 

Aqannyń anasy Zýhra Ákimjanova bes bala tárbıelep otyr. Aqan otbasyndaǵy tórtinshi perzent eken.

«Bul jańalyqty estigende Aqan men 5 jastaǵy bala úshin alańdadym. Tabandylyq tanytyp, kómek qolyn sozýǵa tyrysqan ulymdy maqtan tutamyn. Synyp jetekshisimen sóıleskende, ol bolǵan oqıǵadan keıin Aqannyń mektepke barǵanyn jáne eshkimge eshteńe aıtpaǵanyn aıtty. Maqtanǵysy kelmedi me eken? Onyń dostary men synyptastary fotosýretter men beınelerdi kórsetip, mán-jaıdy jetkize bastaǵan. Aqannyń eseıip, batyl, sabyrly, baısaldy azamatqa aınalyp kele jatqanyna qýanamyn», - deıdi anasy.

Esterińizge salsaq, Astana qalasynyń ákimi Jeńis Qasymbek Aqanǵa alǵys retinde planshet pen 1 mıllıon teńge syıaqy tabystaǵan bolatyn.