Jańa zańnyń maqsaty jappaı ata-ana quqyǵynan aıyrý emes – Máýlen Áshimbaev

<p>ASTANA. KAZINFORM — Áıelderdiń quqyǵy men balalardyń qaýipsizdigin qamtamasyz etý týraly zań ata-ana quqyǵynan aıyrýdy kózdemeıdi. Qujat erejeleri eń aldymen qorǵaý jáne qaýipsizdik maqsatyn kózdeıdi. Basqasha túsindirip, san-saqqa júgirtý múlde durys emes. Bul jóninde Máýlen Áshimbaev palata otyrysynda zańdy talqylaý barysynda aıtty.</p>

Máýlen Áshimbaev atap ótkendeı, bul zańdar Memleket basshysynyń tapsyrmalary aıasynda ázirlengen.

Ondaǵy normalar áıelder men balalarǵa qatysty qylmystardyń aldyn alýdy jáne jolyn kesýdi kózdeıdi. 

Senat spıkeri osyǵan baılanysty áriptesterin zańdardyń negizgi maqsattaryn durys túsindirýge jáne engizilgen erejelerdiń mańyzyn jurtshylyqqa jetkizýge shaqyrdy.

«Qazirdiń ózinde qoldanystaǵy zańnamada, neke jáne otbasy týraly zańda ata-analar qandaı da bir qylmystyq quqyq buzýshylyq jasaǵan jaǵdaıda ata-ana quqyǵynan aıyrylatyn normalar bar. Alaıda, ol normalar jappaı ata-ana quqyǵynan aıyrýǵa ákelmegeni belgili. Tarıhymyzda ondaı jaǵdaı bolǵan joq. Sondyqtan Memleket basshysy zańǵa qol qoıyp, kúshine engen jaǵdaıda qujat jappaı ata-ana quqyǵynan aıyrýǵa ákeledi degenge senýdiń eshqandaı negizi joq. Bul meniń jeke pikirim. Bul qate jáne teris túsiný. Zańda mundaı normalar joq. Sol sebepti osy zań ata-analardy ata-ana quqyǵynan aıyrýǵa arnalmaǵanyn naqty ári anyq túsindirip, jetkizýimiz kerek. Ol áıelderdi qorǵaý jáne balalardyń qaýipsizdigin qamtamasyz etý úshin jumys isteıdi», — dedi Senat spıkeri qaralyp otyrǵan zań týraly.

Aıta keteıik, búgin senatorlar palata otyrysynda «Qazaqstan Respýblıkasynyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańdy jáne oǵan ilespe «Qazaqstan Respýblıkasynyń Ákimshilik quqyq buzýshylyq týraly kodeksine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańdy eki oqylymda qarap, maquldady.