Búgingi aýyzashar 90-shy jyldardaǵy dıskotekaǵa aınalyp ketpeýi kerek – Nurlan Baıjigituly

<p>ASTANA. KAZINFORM - &laquo;Oraza qabyl bolsyn!&raquo; baǵdarlamasynyń kezekti efıri oraza jáne sáresi men aýyzashardyń ádepteri, saýap jınaý máselesi, toıǵa aınalǵan aýyzashar jaıyna arnaldy.</p>

Dintanýshy toqshylyqtyń qadirin, joqshylyqtyń qasıeti týraly taǵlymdy oı aıtty. «Aýyzasharǵa kimderdi shaqyrǵan durys nemese kimderdiń kelgeni saýaptyraq?», «Aýyz bekitý duǵasyn arabsha aıtamyz ba, qazaqsha aıtamyz ba?» degen jıi qoıylatyn suraqtarǵa da jaýap berdi.

«Aýyzashar ýaqyty bul tek tamaq ishetin kez emes, bul kúnániń tógiletin sáti» deı kele toıǵa aınalǵan aýyzashardyń máni men mańyzyna toqtaldy.

«Jalpy, júz, eki júz adamnyń basyn qosyp beriletin aýqymdy aýyzasharda Jaratqandy, paıǵambardy ulyqtaıtyn salaýatty, qazaqtyń jyr-termeleri, án-kúıleri, jarapazan nemese Quran jattaýdan jarys, terme aıtýdan saıys, Otandy súıý, tárbıeli ǵıbrattar, ulttyq oıyndar oınatylsa, munda turǵan eshteńe joq. Bastysy, «90-nyń dıskotekasy» dep arty tarsyl-gúrsildiń bıine ulasyp ketpeýi kerek», - dedi Nurlan Baıjigituly.