Búgin Pavlodardaǵy oqýshylardyń 44 paıyzy mektepke barmaı qoıǵan
Pavlodar qalasyndaǵy mektepterde tańerteńgi aýysymda 10 400, tústen keıingi aýysymda 11 500 bala sabaqqa kelmegen. Qalalyq bilim berý bólimi ózge oqýshylarmen oqytý protsesi shtattyq rejimde ótip jatqanyn habarlady.
- Barlyq pedagogıkalyq ujym jumys oryndarynda. Kúzet agenttikteri qarqyndy jumys isteýde, beınekameralarǵa monıtorıng júrgizilýde. Sonymen qatar, polıtsııa basqarmasynyń qyzmetkerleri qalanyń ár mektebine kezekshilik etýde. Búgingi kúni mektepke oqýshylardyń 44 paıyzy sabaqqa kelmedi, onyń 12 paıyzy dáleldi sebeptermen (densaýlyq jaǵdaıyna, ótinish jáne basqa sebepter boıynsha) bosatty, - dep habarlady qalalyq bilim berý bólimi.
Pavlodar qalasynyń barlyq mektepteri QR Úkimetiniń 2021 jylǵy 12 sáýirdegi № 234 qaýlysymen bekitilgen erejelerge sáıkes terrorıstik turǵydan osal obektilerdiń úshinshi tobyna jatady. Bul top sıgnalızatsııa júıesimen, aýmaqtyq ishki ister organdarynyń kezekshi bólimderine ne kúzet qyzmeti sýbektilerin ortalyqtandyrylǵan baqylaý pýltine shyǵarýy bar dabyl túımesimen, beınebaqylaý júıesimen, beınebaqylaýdy JBO-ǵa, ne aýmaqtyq ishki ister organdarynyń kezekshi bólimderine bere otyryp, beınebaqylaý júıesimen, sondaı-aq kirýdi baqylaý jáne basqarý júıelerimen (týrnıketter) jaraqtandyrylýǵa tıis.
Bul sharalar barlyq uıymdarda qabyldanǵan. Evakýatsııalaý josparlary ázirlenip, ár qabatqa ilindi. Budan basqa, árbir toqsanda polıtsııa departamenti, TJ basqarmasy birlesip qyzmetkerler men oqýshylardy aqparattandyrý maqsatynda qala mektepteriniń bazasynda oqý-jattyǵýlar, dárister ótkizedi
Eske sala keteıik, áleýmettik jelide Pavlodar mektepterine belgisiz tulǵalar qylmys jasaýǵa daıyndalyp jatqany týraly aqparat tarap, atalǵan fakti boıynsha Polıtsııa departamenti tekserý júrgizýde.