Búgin Qyzylorda oblysynda 8 aýyldyń ákimi saılanady
Oblystyq saılaý komıssııasynyń málimetine súıensek, aýdandar boıynsha Aralda Bógen, Sazdy, Qosaman, Qazalyda Alǵa, Tasaryq aýyldyq okrýgteriniń turǵyndary óz tańdaýyn bildiredi.
Sondaı-aq Qarmaqshydaǵy T.Kómekbaev jáne Jalaǵashtaǵy Tań, Shıelidegi Telikól aýyldyq okrýg ákimderiniń saılaýy ótkizilýde.
Munda barlyǵy 5880 saılaýshy daýys berý quqyǵyna ıe bolyp otyr. Bul boıynsha 11 saılaý ýchaskesi qurylyp, 59 komıssııa múshesi qyzmet atqarýda.
Qazalylyq Shamaranovtar áýleti Tasaryq aýyldyq okrýgindegi № 77 saılaý ýchaskesine otbasymen erte keldi. Áýlettiń úlkeni Bolatbek Shamaranov shóberesimen birge óz tańdaýyn jasady.
Aıta ketsek, 8 aýyldyq okrýg boıynsha 26 kandıdat saılaý bıýlletenine engizildi. Onyń 25-i ózin-ózi usyný jolymen, 1-i saıası partııa atynan baq synaýda.
Eske salsaq, budan buryn tamyzda Qyzylorda oblysynda bir kúnde aýdan jáne 8 aýyl ákiminiń saılaýy ótken edi.