Búgin Qarýly kúshter jergilikti áskerı basqarý organdarynyń kúnin atap ótti

<p>ASTANA. KAZINFORM &ndash; Bul kún Qazaq KSR Prezıdentiniń 1991 jylǵy 12 qyrkúıekte kúshine engen QazKSR áskerı komıssarıatyna respýblıkalyq organ mártebesin berý jáne oǵan oblystyq áskerı komıssarıattardyń baǵynýy týraly Jarlyǵymen baılanysty. Bul týraly QR Qorǵanys mınıstrliginiń baspasó qyzmeti málim etti.&nbsp;&nbsp;</p>

Qorǵanys isteri jónindegi departamentterine, basqarmalar men bólimderine QR Qarýly kúshteriniń, basqa da áskerleri men áskerı quralymdarynyń jumyldyrý daıyndyǵyn qoldaý jáne olardy barlyq deńgeıdegi áskerı qyzmetshilermen jasaqtaý mindeti júktelgen.

Jergilikti áskerı basqarý organdary qorǵanys vedomstvosynyń «qoǵamdyq qabyldaý bólmesi» dep atalady. Olar jumyldyrý resýrstaryn esepke alady jáne daıyndaıdy, azamattardy merzimdi áskerı qyzmetke jáne kelisimshart boıynsha shaqyrýdy uıymdastyryp, júrgizedi, jastardy áskerı qyzmetke ázirleıdi.

Jergilikti atqarýshy organdarmen jáne respýblıkalyq qoǵamdyq uıymdarmen tyǵyz qarym-qatynasta áskerı basqarý organdarynyń ofıtserleri óskeleń urpaqty áskerı-patrıottyq tárbıeleý jumysyn júrgizedi, áskerı oqý oryndaryna túsýge nıet bildirgen jastar arasynda kásiptik baǵdar berý jumystarymen aınalysady.

«Búginde JÁBO qyzmetin jetildirý jáne tsıfrlyq tehnologııalardy engizý boıynsha dáıekti jumys júrgizilip jatyr. „Tsıfrlyq Qazaqstan“ tujyrymdamasyn iske asyrý sheńberinde áskerı mindettiler men áskerge shaqyrylýshylardy elektrondy esepke alý kartalaryn júrgizý, azamattardy turǵylyqty jerin aýystyrǵan kezde olardyń jeke kelýinsiz JÁBO-ǵa bekitý sııaqty protsester ońtaılandyryldy. Budan basqa, áskerge shaqyrý jasyndaǵy azamattardy tirkeý týraly kýálikter men beıbit ýaqytta áskerı bıletter berý toqtatyldy», — delingen habarlamada.

Qorǵanys isteri jónindegi organdardyń jumysyn tsıfrlandyrý tórt memlekettik qyzmetti proaktıvti formatqa aýystyrýǵa múmkindik berdi. Avtomatty túrde merzimdi áskerı qyzmetke shaqyrýdy keıinge qaldyrý jáne bosatý beriledi, 17 jastaǵy jigitterdi tirkeý júzege asyrylady.

Azamattyń áskerı qyzmetke qatynasy týraly derekter eGov jáne mGov portaldaryndaǵy «Jeke kabınette» kórsetiledi jáne zańdy tulǵalarǵa onlaın-rejımde beriledi.