Búgin elimiz boıynsha 70 jańa mektep ashyldy
Vedomstva basshysy oqýshylardy 2024-2025 oqý jylynyń bastalýymen quttyqtady. Ol memleket tarapynan balalardy sapaly bilimmen, sanaly tárbıemen qamtý baǵytynda jasalyp jatqan sharalardy atap ótti.
1 qyrkúıekte 90 myńǵa jýyq oqýshy qoldanysqa bıylǵy jyly berilgen, onyń ishinde «Jaıly mektep» ulttyq jobasy aıasynda salynǵan sý jańa mektep partalaryna otyrdy. Al 200 myńnan astam bala kúrdeli jóndeýden ótip, qaıta jabdyqtalǵan mektepterde bilim alady.
«Búgin ustazdardyń óskeleń urpaqqa bilim men tárbıe berýdegi orasan eńbegin atap ótkim keledi. Ulttyń aǵartýshy uly tulǵasy Ahmet Baıtursynuly «Ustaz - ult kelbeti» dep beker aıtpasa kerek. Sondyqtan aǵartýshylyq mıssııasyn adal atqaryp júrgen ustazdardyń eńbegi laıyqty túrde joǵary baǵalanýy tıis. Bıylǵy oqý jyly joǵary jetistikter men tolaǵaı tabystarǵa toly bolsyn!» - dedi Ǵanı Beısembaev óz quttyqtaýynda.
Esterińizge sala keteıik, «Jaıly mektep» ulttyq jobasy oqýshy ornynyń jetispeýshiligi máselesin sheshýge jáne qala men aýyl mektepteri arasyndaǵy alshaqtyqty azaıtýǵa baǵyttalǵan. Jobada fýnktsıonaldy jáne qaýipsiz bilim berý ortasyn qurýǵa erekshe nazar aýdarylady.
Bastaýysh jáne joǵarǵy synyp oqýshylary úshin bólek bloktar qarastyrylǵan. Sondaı-aq zamanaýı tehnıkalyq quraldardy engizý arqyly qaýipsizdik sharalaryn arttyrý, erekshe bilim berýdi qajet etetin balalar úshin kedergisiz orta qalyptastyrý, mektepti zamanaýı pándik kabınettermen jabdyqtaý talap etiledi.