Búgin Dımash Qudaıbergen 30 jasqa toldy
Dımash Qudaıbergen Aqtóbe qalasynda týǵan. Ata-anasy — tanymal ánshiler Qanat jáne Sveta Aıtbaevtar.
Ol alǵash ret spektaklde oınap, kópshilikke tanyla bastady. Bes jasynda tuńǵysh ret mýzykalyq kolledj sahnasynda án salǵan.
Alty jasynda «Aınalaıyn» respýblıkalyq baıqaýynyń «Fortepıano» nomınatsııasynda jeńimpaz atandy.
2010 jyly «Baıqonyrdyń ásem daýystary» Halyqaralyq festıvaliniń І júlde laýreaty atandy.
2012 jyly «Jas qanat» respýblıkalyq jas án oryndaýshylar baıqaýynyń Gran-prı júldesine ıe bolyp, osy jyly «Vostochnyı bazar» halyqaralyq baıqaýynda І júlde laýreaty atandy.
2013 jyly Dımash Qudaıbergen «Meıkın Azııa» І halyqaralyq festıvaliniń jeńimpazy boldy. Sonymen qatar Vıtebsk qalasynda ótken XXIV halyqaralyq estradalyq án oryndaýshylar «Slavıan bazary-2015» baıqaýynda Gran-prı jeńip alǵan.
2015 jyly 28 qazan kúni Ystanbulda Dımash Qudaıbergen «Abu TV» Halyqaralyq Azııa-Tynyq muhıt festıvalinda Qazaqstan Respýblıkasynyń atynan alǵash ret qatysty.
2014 jyly Dımash Ahmet Jubanov atyndaǵy mýzykalyq kolledjde akademııalyq án oryndaý synybyn támamdap, Qazaq Ulttyq óner ýnıversıtetiniń «estrada óneri» fakýltetine tústi.
Dımash qazaq, aǵylshyn, orys, qytaı, serb, ıtalıan, frantsýz, taǵy basqa tilderde án oryndaıdy.
Qytaıdyń I am a singer (Men ánshimin) telebaıqaýyna qatysyp, saıystyń barlyq kezeńinen ótip, ekinshi oryndy jeńip aldy. Atalǵan jobany Qytaıdyń eń iri Hunan TV telearnasy kórsetti.
2017 jyly Dımash Azııanyń «Gremmıi» sanalatyn «Top Chinese Music Award» syılyǵynyń «Azııanyń eń tanymal ánshisi» atalymynda jeńiske jetti. Munan bólek kóptegen halyqaralyq júldelerdiń ıegeri.
Óner ıesi 30 jasyn Túrkııada qarsy aldy.
Dımash Qudaıbergenniń dúnıe júzi boıynsha jankúıerleri súıikti ánshisin 30 jasqa tolǵan mereıtoıymen quttyqtap jatyr. Ásirese, Ulybrıtanııadaǵy tyńdarmandary belsendi.
Jýyrda Aqordada mádenıet jáne óner qyzmetkerlerin kásibı merekelerimen quttyqtaǵan Memleket basshysy Qasym-Jomart Toqaev búginde kóptegen ul-qyzdyń erekshe darynymen búkil álemdi tań qaldyryp júrgenin atap ótken bolatyn. Tipti, qazaq fonemeni degen uǵym paıda bolǵanyn aıtty. «Dımashtyń biregeı ónerine tánti bolǵan túrli eldiń azamattary Qazaqstannyń Ánuranyn aıtyp, kók týyn jelbiretip júr. Ónerdiń qudireti degenimiz de osy», — degen edi Prezıdent.
Aıta ketsek, Kýala-Lýmpýr áýejaıynda Qazaqstan ánuranyn shyrqaǵan dúken qyzmetkeriniń vıdeosy TikTok jelisine keńinen taraǵan edi. Qoǵam muny «Dımashtyń áseri» dep baǵalady. Kazinform tilshisi Malaızııa áýejaıynyń qyzmetkerinen eksklıýzıvti suhbat aldy.
Bıyl jańa jyl merekesinde Dımash Qudaıbergen Aqordada sımfonııalyq orkestrdiń súıemeldeýimen ánuranymyzdy shyrqaǵan bolatyn.