Búgin aýdandar men qalalardyń 45 ákimi saılanady
Aýdan, oblystyq mańyzy bar qala ákimin saılaýdy tıisti aýmaqtyq saılaý komıssııasy máslıhattyń sheshimimen belgilengen aýdan, oblystyq mańyzy bar qala ákimin saılaýdy ótkizetin kúnge deıin keminde 50 kún buryn taǵaıyndady.
Saılaý kúni týraly habarlama jergilikti buqaralyq aqparat quraldarynda jarııalandy.
17 oblystyń máslıhattary pılottyq rejımde saılaý ótkizý úshin 42 aýdan men oblystyq mańyzy bar 3 qalanyń tizbesin bekitti.
Saılaý 5 qarashaǵa belgilendi.
Kandıdattardy tirkeý saılaý komıssııasy búkil qajetti qujattardy alǵannan keıin bastaldy jáne saılaý kúnine 25 kún qalǵanda jergilikti ýaqyt boıynsha saǵat 18.00-de aıaqtaldy.
Al kandıdattardyń saılaý aldyndaǵy úgiti kandıdattardy tirkeý merzimi aıaqtalǵan sátten bastalyp, saılaý kúnine 25 kún qalǵanda jáne saılaý kúnine deıingi kúnniń jergilikti ýaqyty boıynsha saǵat 00.00-de toqtatyldy.
Saılaý aldyndaǵy úgitti ótkizý Saılaý týraly konstıtýtsııalyq zańmen rettelgen.
Basqa kandıdattarmen salystyrǵanda daýys berýge qatysqan saılaýshylardyń kóp daýysyn jınaǵan kandıdat saılanǵan ákim bolyp sanalady.
Aýmaqtyq saılaý komıssııalary aýdandar men oblystyq mańyzy bar qalalardyń ákimdigine 164 kandıdatty tirkedi. Olardyń 69-yn saıası partııalar, al 95-i ózin-ózi usyndy.
Tirkelgen úmitkerlerdiń ortasha jasy — 46,4 jas. Eń jasamys úmitker Mańǵystaý oblysynyń Beıneý aýdanynda — 61 jasta, eń jasy Túrkistan oblysynyń Maqtaaral aýdanynda — 29 jasta.
Úmitkerlerdiń kópshiligi — er adamdar. Sonymen birge 10 áıel tirkelgen.
Tirkelgen kandıdattardyń 20,73 paıyzy — ekonomıst, 19,51 paıyzy — zańger, 16,46 paıyzy — oqytýshy, 12,2 paıyzy — ınjener, 11,59 paıyzy — aýyl sharýashylyǵy mamany jáne 19,51 paıyzy — basqa mamandyq ókilderi.
Aýdandar men oblystyq mańyzy bar qalalar ákiminiń saılaýyndaǵy ortasha báseke 3-ten asady.
Eń joǵary báseke Jetisý oblysynyń Kerbulaq aýdanynda — bir orynǵa 6 kandıdat.
Eń tómeni Aqmola oblysynyń Shortandy aýdanynda — bir orynǵa 2 kandıdat.