Búgin — Astana kúni
Elimiz táýelsizdik alǵannan keıin, el astanasyn ońtústikten ortalyqqa qaraı kóshirý máselesi kóterildi. Astanany Almatydan Aqmolaǵa aýystyrý týraly sheshimdi Qazaqstan Respýblıkasy Joǵarǵy Keńesi 1994 jyly 6 shildede qabyldady.
Astanany resmı kóshirý 1997 jylǵy 10 jeltoqsanda júzege asty. Qazaqstannyń sol kezdegi prezıdenti Nursultan Nazarbaevtyń 1998 jylǵy 6 mamyrdaǵy Jarlyǵymen Aqmolanyń ataýy Astana bolyp ózgertildi.
Jańa astananyń halyqaralyq tusaýkeseri 1998 jylǵy 10 maýsymda ótti. Derekterge súıensek, elordany aýystyrý týraly sheshim qabyldanǵan kezde, Astana halqynyń sany 290 myńdaı ǵana bolǵan eken. 2024 jylǵy 1 mamyrǵa qala halqynyń sany 1458,1 myń adamdy qurady. Halyqtyń tabıǵı ósimi 2024 jylǵy qańtar-sáýirde 7556 adamǵa jetken. Al bıyl qańtar-sáýirde elordada 9441 sábı dúnıe esigin ashqan.
2019 jyly 23 naýryzda Astana qalasynyń ataýy Nur-Sultan bolyp ózgerdi. Araǵa eki jyl salyp, 2022 jylǵy 17 qyrkúıekte Memleket basshysy Qasym-Jomart Toqaevtyń Jarlyǵymen elordaǵa «Astana» ataýy qaıta berildi.
«Astana kúni» jyl saıyn memlekettik deńgeıde keńinen atalyp ótedi. Bıyl da elorda ákimdigi qala kúnine oraı 100-ge jýyq is-shara uıymdastyryp otyr.
5-7 shilde aralyǵynda elordada «Eýrazııa teatry» halyqaralyq kóshe teatrlarynyń festıvali ótýde. Іs-sharaǵa estonııalyq, polshalyq, reseılik jáne qazaqstandyq teatr ujymdary men ártister qatysady.
6 shildede saǵat 11:00–de halyqaralyq kóshe teatrlary festıvaline qatysýshylardyń sherýi ótedi. Ol qala alańynan bastalyp, Ortalyq saıabaqqa deıin jalǵasady.
7 shildede saǵat 14:00–den bastap Ortalyq saıabaqta festıval qatysýshylarynyń teatrlandyrylǵan qoıylymdary ótedi. Saǵat 17:00–de festıval aıaqtalady.
6 shilde kúni saǵat 20:00–de Amfıteatrda E.Rahmadıev atyndaǵy Memlekettik akademııalyq fılarmonııa ártisteriniń qatysýymen «Astana — arman qala» merekelik kontserti ótedi. Іs-sharaǵa belgili óner qaıratkerleri men estrada juldyzdary Maıra Іlııasova, Qanat jáne Sveta Aıtbaevtar, Araılym Rahımqyzy, Gúlnur Orazymbetova, Zarına Omarova, Muratbek Haırolda, Farıda Joldasova, Ákimhan Májenov, Altynshash Muqataeva, sondaı-aq DJ Dake jáne «ALEM» zamanaýı bı baleti qatysady.
6 shilde kúni saǵat 11:00–de jáne saǵat 15:00–de qala shetindegi turǵyn alaptarda elorda turǵyndary men qonaqtaryna arnalǵan «Astana — júregim» kontserti ótedi. Merekelik is-sharada Mádı Qadyrov, Gúlnur Orazymbetova, Dosymjan Tańatarov, Medet jáne Klara Salyqovtar, Baýyrjan Isaev jáne qazaqstandyq estradanyń basqa da juldyzdary óner kórsetedi.
6, 7 jáne 8 shildede saǵat 12:00–den bastap qala qonaqtary men turǵyndary úshin Ortalyq saıabaqta «Mereke stree» jazǵy jobasy jumys isteıdi. Bul — sheberlik synyptary men ashyq aspan astyndaǵy kınoteatry bar barlyq jastaǵy azamattarǵa arnalǵan Otbasylyq demalys festıvali.
6 shildede saǵat 18:00–de EKSPO alańynda OPEN AIR ashyq aspan astyndaǵy merekelik kontsert ótedi. Іs-sharada otandyq estrada juldyzdary Ninety one, Orda, Raim, Sadraddin, Kalifarniya, Nazima, Alpha, T’OI, Imzi, Qurmash Mahan, Jazzdauren jáne basqa da ártister óner kórsetedi. Kontsert aıaqtalǵannan keıin shamamen saǵat 22:15–te (22:30) «ASPAN» dron-shoýy josparlanyp otyr.