Búgin 2024 jylǵy Parıj Olımpıadasy saltanatty túrde ashylady
Dúbirli doda 26 shilde men 11 tamyz aralyǵynda ótedi. Oıynǵa álemniń 205 elinen sportshylar qatysady dep josparlanǵan. Búgingi oıyndardyń ashylý saltanatyna oraı kóshede qaýipsizdik qyzmetteri de kúsheıgen.
Resmı emes derek kózderine súıensek, ashylý saltanatynda olımpıada alaýyn jeńil atletıkadan úsh dúrkin Olımpıada chempıony Marı-Joze Perek men dańqty fýtbolshy Zınedın Zıdan jaǵýy múmkin. 2024 jylǵy Olımpıada oıyndarynyń uıymdastyrý komıtetiniń basshysy Tonı Estangeniń ashylý saltanaty týraly az-kem aqparat berdi.
«Olımpıadanyń ashylý saltanaty qanshalyqty mańyzdy ekenin bilemiz. Sondyqtan da, biz áý bastan qulshynysymyz myqty boldy. Bul ashylý saltanaty bizdiń oıynǵa degen qulshynysymyzdy kórsetip, Frantsııadaǵy jaqsy nárselerdiń bárin pash etkenin qalaımyz», - dedi ol.
Sportshylar sherýi Sena ózeninde ótedi. Árbir delegatsııa óz qaıyǵymen júzip ótedi. Baǵyttyń uzaqtyǵy alty shaqyrym. Qazaqstandyq sportshylar Olımpıada oıyndarynda sporttyń 25 túrinen synǵa túsedi. Elimizdiń atynan 80 sportshy 92 joldama jeńip alǵan bolatyn.
Qazaqstan quramasynyń týyn Aslanbek Shymbergenov pen Olga Safronova ustap shyǵady. Parıj Olımpıadasy Qazaqstannyń táýelsiz el retinde qatysqaly otyrǵan segizinshi jazǵy Olımpıadasy bolmaq. Sondaı-aq, Eýropa qurlyǵynda úshinshi ret (Afına, London, Parıj) baq synaıdy.
Qazaqstandyq sportshylar boks, dzıýdo, sporttyq gımnastıka, jeńil atletıka, baıdarka men kanoede esý, oqpen atý, semserlesý, grek-rım kúresi, erkin kúres, sadaq atý, stendtik atý, tennısten synǵa túsedi.
Sondaı-aq olar veloshosse, júzý, zamanaýı bessaıys, taekvondo, velotrek, batýt gımnastıkasy, badmınton, akademııalyq esý, kórkem gımnastıka, trıatlon, ústel tennısi, quzǵa shyǵý jáne breıkıngten jarys jolyna shyǵady.
HHHІІІ jazǵy Olımpıada oıyndarynyń jeńimpazdary men júldegerleri Eıfel munarasynyń etegindegi Trokaderoda ornalasqan Chempıondar saıabaǵynda marapattalady.