Búginnen bastap 86 qyzmettiń aqysy onlaın-kassalyq baqylaý arqyly tólenedi

NUR-SULTAN. QazAqparat - Búginnen bastap elimizdegi 86 qyzmet túri onlaın-kassalyq baqylaý arqyly jumys isteıtin bolady, dep habarlaıdy QazAqparat tilshisi.

Qazaqstan Respýblıkasy Qarjy mınıstriniń 2018 jylǵy 16 aqpandaǵy № 206 «Qazaqstan Respýblıkasynyń aýmaǵynda júzege asyrý kezinde salyq tóleýshiler aqshalaı esep aıyrysý kezinde derekterdi tirkeý jáne (nemese) berý fýnktsııasy bar baqylaý-kassa mashınalaryn qoldanatyn qyzmet túrlerin bekitý týraly» buıryǵyna engizilgen ózgertýler men pen tolyqtyrýlar kúshine endi.

Atalmysh buıryq 2019 jyly onlaın-baqylaý-kassalyq mashınalardy qoldanatyn qyzmet túrlerin keńeıtýdi kózdeıdi.

QR qarjy mınıstrliginiń memlekettik kirister komıtetiniń habarlaýynsha, bıyl toqsan saıynǵy negizde 633 qyzmet túri onlaın-baqylaý kassalyq mashınalaryn qoldanýǵa kóshýi tıis.

1 sáýirden 323 qyzmet túrin, 1 qazannan bastap 224 qyzmet túrin kórsetýshiler onlaın-kassa arqyly esep aıyrysady.

Bir aıta keterligi, bul buıryqtyń ınternetpen qamtylmaǵan eldi mekenderge qatysy joq.

«Onlaın-BKM qoldaný boıynsha talaptar telekommýnıkatsııa jelileri joq aýmaqtarda qyzmet kórsetetin salyq tóleýshilerge qoldanylmaıdy. Jalpy baqylaý kassalyq mashınalardy qoldaný tártibi salyq kodeksiniń 166-babymen retteledi», - delingen komıtettiń aqparatynda.

Kodekske sáıkes, BKM qoldaný talaby tómendegi tulǵalardyń aqshalaı esep aıyrysýyna qoldanylmaıdy:

1) jeke tulǵalar;

2) advokattar men medıatorlar;

3) aktsızdeletin taýarlardy ótkizýshilerden basqa jeke kásipkerlerge

patent boıynsha jumys isteıtin kásipkerlerge 2020 jyldyń 1 qańtaryna deıin;

biryńǵaı jer salyǵyn tóleý negizinde arnaıy salyq rejımi sheńberinde 2020 jyldyń 1 qańtaryna deıin;

4) bılet bere otyryp, qalalyq qoǵamdyq kólikte tasymaldaý boıynsha halyqqa qyzmet kórsetý bóliginde;

5) Qazaqstan Respýblıkasy ulttyq bankine;

6) ekinshi deńgeıdegi bankterge.