Búgingi tańda múmkindigi shekteýli 200 myń adam sportpen aınalysady

ASTANA. QazAqparat - Qazaqstanda múmkindigi shekteýli 200 myń adam sportpen aınalysady. Bul týraly búgin Koreıanyń Inchhon qalasyndaǵy XI Azııalyq Para oıyndar - 2014-tiń qorytyndylaryna arnalǵan brıfıngte QR Mádenıet jáne sport vıtse-mınıstri Tastanbek Esentaev málim etti.

Vıtse-mınıstrdiń aıtýynsha, qazirgi ýaqytta bizdiń sportshylarǵa jasaǵan áleýmettik jaǵdaılar búkil álem boıynsha úzdikterdiń qatarynda.

"Álemde Qazaqstan sııaqty óz sportshylaryna áleýmettik jaǵdaı kórsetip otyrǵan birde bir memleket joq. Birinshiden, zańǵa Paralımpıada men Sýrdlımpıada týraly bólek baptar arnaǵanymyzdyń ózi jetistik. Ekinshiden, jeńimpazdarǵa ómir boıy tólemaqy belgilenedi. Úshinshiden, Paralımpıada oıyndarynda 1-6 oryndar jeńip alǵan sportshylarǵa 50 myńnan 4 myń AQSh dollaryna deıin syıaqy beriledi", - dep atap ótti ol.

Eske sala keteıik, qazaqstandyq sportshylar jaqynda aıaqtalǵan Inchhondaǵy Para Azııa oıyndarynda 7 altyn, 6 kúmis jáne 11qola jeńip alyp, jalpy esepte 11-orynǵa ıe bolǵan edi.

"Paralımpıada oıyndaryna qatysqan sportshylardyń barlyǵy - jeńimpaz. Sebebi olar óz-ózderin jeńe bilip, Paralımpıada qatysýǵa múmkindik jeńip aldy. Sizder osynshama medal jeńýleriń kerek degen sııaqty talaptardy qoıǵymyz kelmeıdi. Olar jastarymyzǵa úlgi. 2013 jylǵy statıstıka boıynsha 600 myńnan astam múmkindigi shekteýli jandar bar. Sonyń ishinde 200 myńnan astamy ǵana sportpen aınalysýǵa múmkindik alǵan jáne jańa medıtsınalyq em alýǵa ruqsatnama ala alady. Ókinishke oraı, 200 myńnyń 18 myńy ǵana, tek 8 paıyzy bizde daıyndalýda. Bizdiń maqsatymyz osy jeńister arqyly qalǵan azamattardy sportpen aınalysýǵa yntalandyrý", - dedi T. Esentaev.