Búgingi saılaý Qazaqstannyń ósip-órkendeýine tyń serpin beredi – Máýlen Áshimbaev
«Búgin el damýyndaǵy mańyzdy kúnderdiń biri. Ásirese, qazirgideı kúrdeli kezeńde bul saılaýdyń burynǵylardan jóni bólek. Memleket basshysynyń bastamasymen qolǵa alynǵan birqatar saıası reformalardyń alǵash ret osy naýqanda iske asyrylyp jatqanyn da jaqsy bilemiz. Sonyń ishinde partııalyq tizimderge áıelder men jastarǵa arnaıy 30 paıyzdyq kvotanyń engizilýin, parlamenttik oppozıtsııa ınstıtýtynyń zańmen bekitilýin jáne saıası partııalardy tirkeý tártibiniń jeńildetilýin erekshe atap ótýge bolady», - dep jazdy ol Facebook-paraqshasynda.
Sonymen qatar Senat spıkeri búgingi saılaý Prezıdentimizdiń áleýmettik-ekonomıkalyq bastamalaryn tabysty júzege asyrýǵa jáne Qazaqstannyń ósip-órkendeýine tyń serpin beredi dep senetindigin basa aıtady.
«Ol úshin azamattarymyz daýys berýde belsendilik tanytýy qajet. Men de búgin saılaý ýchaskesine baryp, óz tańdaýymdy jasadym. Daýys berý – árqaısymyzdyń azamattyq quqyǵymyz jáne boryshymyz. Bul – ár azamat úshin memlekettiń damýyna yqpal etetin múmkindik. Sol sebepti, elimizdegi barsha saılaýshylardy osy múmkindikti jibermeı, saıası naýqannan qalys qalmaýǵa shaqyramyn», - dedi Máýlen Áshimbaev.