Búginde biz JJM naryǵyndaǵy jaǵdaıdy turaqtandyrýǵa barlyq sharalardy qabyldap jatyrmyz - U. Qarabalın
«Búginde biz JJM naryǵyndaǵy jaǵdaıdy turaqtandyrýǵa barlyq sharalardy qabyldap jatyrmyz. Qazir elimizdiń bazalarynda AI-92 markaly janar-jaǵar maıdyń 95 myń tonnasy saqtaýly. Bolashaqta ózimizdegi munaı óńdeý zaýyttaryn jetildirip, damytqannan keıin, 2016 jyldan soń Qazaqstan óz naryǵyn janarmaımen tolyqtaı qamtamasyz etetin bolady», - dep atap ótti U. Qarabalın.
Onyń aıtýynsha, qazirgi keıbir janarmaı quıý stansalarynda janarmaı tapshylyǵy sezilýde. Onyń sebebi 21 tamyzda janarmaı baǵasyn kótergenge deıin Reseıden janarmaı tasymaldaýshy kóptegen kompanııalar shyǵynǵa batpas úshin óz jumystaryn toqtatqan. «Endi janarmaı baǵasyn kóterý týraly sheshim shyqqan keıin burynnan beri Reseıden JJM tasyp kelgen kompanııalar qaıtadan elge janarmaı ákele bastady. Osylaısha bir-eki aptanyń ishinde birtindep janarmaı quıý stansalaryndaǵy tapshylyq joıylady», - dedi ol.