Búginde 400 aqparattyq júıe bar - Tsıfrlyq damý mınıstrligi

NUR-SULTAN. QazAqparat – Búgin Memleket basshysy Joldaýynda berilgen tapsyrmalardy oryndaýǵa arnalǵan Úkimet otyrysynda Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın memlekettik qyzmetterdiń 100 paıyzyn smartfon arqyly qoljetimdi etýge múmkindik jasalatynyn aıtty, dep habarlaıdy QazAqparat.

«Memlekettik basqarýdy tsıfrlandyrýǵa qatysty eki tapsyrma berildi. Bul Tsıfrlyq transformatsııa ortalyǵynyń (TsTO)qyzmetin kúsheıtýge qatysty. Ortalyq qazirdiń ózinde protsesterdi reınjınırıngteý bóliginde naqty nátıjeler berip jatyr. Eger qalaı bolǵanyn salystyratyn bolsaq, onda normatıvtik-quqyqtyq aktiler men zańdar negizinen alǵysharttary bolyp, biz bar bıznes-protsesterdi tsıfrlandyrdyq. Endi TsTO retsizdikti avtomattandyrmaý úshin protsesterdi qaıta qaraý boıynsha jumys júrgizetin bolady. Reınjınırıng arqyly ótken protsester platformalyq modelde avtomattandyrylatyn bolady. Platformalyq modelge ótýdiń alǵysharttary túsinikti», - dedi B. Mýsın.

Onyń aıtýynsha, búginde 400 aqparattyq júıe bar. Alaıda, biriktirýlerge baılanysty problemalar týyndaıdy. Bul memlekettik qyzmetterdi elektrondyq alańdarǵa shyǵarýǵa kedergi keltiredi.

«Platformalyq modelge ótýdiń jıyntyǵy retinde data-driven government tujyrymdamasyn iske asyrý bolady. Bul memlekettik qyzmetterdiń 100 paıyzyn smartfon arqyly qoljetimdi etýge múmkindik beredi», - dedi mınıstr.

Budan buryn habarlanǵandaı, Baǵdat Mýsın 100 myń joǵary bilikti IT-mamandy daıarlaý jumysyn túsindirdi.