Búgin - ulttyq valıýta kúni

ASTANA. QazAqparat - 1993 jylǵy 15 qarashada Qazaqstan Respýblıkasynyń ulttyq valıýtasy – teńge aınalymǵa engizildi. Al 1997 jyldan beri Memleket basshysynyń Jarlyǵymen 15 qarasha – tól valıýtamyzdyń týǵan kúni ári qarjygerler kúni retinde atalyp ótedi, dep habarlaıdy QazAqparat tilshisi.

Tól valıýtamyzdyń tarıhyna kóz júgirtsek, 1992 jyldyń 27 tamyzy kúni Ulttyq bank teńge kýpıýrasynyń úlgilerin bekitken bolatyn. Qazaq valıýtasyn ómirge keltirgen sýretshiler Tımýr Súleımenov, Meńdibaı Alın, Aǵymsaly Dúzelhanov, Qaırolla Ábjálelovter eń alǵashqy teńgemizde belgili tarıhı tulǵalardyń portretteri, Alataý men Kókshetaý kórinisteri, Qoja Ahmet ıAssaýı kesenesiniń beınesi, Mańǵystaýdan tabylǵan tastaǵy tańbalar paıdalandy. Bir teńgelik banknotqa Ábý Nasyr ál-Farabı, úsh teńgelikte Súıinbaı, bes teńgelikte Qurmanǵazy, on teńgelikte Shoqan, jıyrma teńgelikte Abaı, elý teńgelikte Ábilqaıyr han, júz teńgelikte Abylaı han beınesi somdaldy.

1993 jyly alǵashqy teńge partııasy Anglııanyń eń kóne ári áıgili «Harrıson jáne uldary» fabrıkasynda basyldy. Teńgeni elge tasymaldaý úshin tórt IL-86 ushaqtary Tumandy Albıon eline 18 márte qatynady. Tól valıýtamyzdyń alǵashqy partııalaryn saqtaý úshin arnaıy jerasty qoımalary daıyndalyp, dál osy qoımalardan ulttyq teńgemiz elimizdiń barlyq óńirlerindegi bankterge 8 kún ishinde jetkizilgen edi.

1993 jyldyń 15 qarashasynda Táýelsiz Qazaqstan Respýblıkasynyń tól valıýtasy aınalymǵa endi. Eski aqshany qazaqstandyq teńgege aıyrbastaý 1993 jyly 15 qarashada saǵat 8.00-de bastalyp, 20 qarashada saǵat 20.00-de aıaqtaldy.

Qazir banknot - Ulttyq banktiń Almaty qalasyndaǵy Banknot fabrıkasynda, al moneta - Óskemendegi Moneta saraıynda shyǵarylady.

Foto: Qazaqstan Respýblıkasy Ulttyq Bankiniń baspasóz qyzmeti