Búgin TMD qurylǵanyna 25 jyl toldy

ASTANA. QazAqparat - 1991 jyly jeltoqsannyń 8-inde Mınskide (Belovej) Reseı, Belarýs jáne Ýkraına basshylary kezdesip, 1922 j. KSRO qurylýy týraly Kelisimi isten joıylǵandyǵy jáne TMD qurylǵandyǵy týraly kelisimge qol qoıdy.

1991 j. jeltoqsannnyń 13-inde Orta Azııa men Qazaqstan basshylary Ashhabadta kezdesip, «Belovej kelisimin» qoldaıtyndyqtaryn málimdedi.

1991 j. jeltoqsannnyń 20-ynda Ázerbaıjan, Armenııa, Belarýs, Qazaqstan, Qyrǵyzstan, Moldova, Reseı, Tájikstan, Túrikmenstan, Ózbekstan basshylary Almatyda 21 jeltoqsanda TMD-ny qurý týraly Kelisim hattamasyna qol qoıdy. Kezdesýge qatysýshylar ishki jáne syrtqy saıasattyń ártúrli salalarynda yntymaqtastyqqa beıildiligin rastaıtyn, burynǵy KSR Odaǵynyń halyqaralyq mindettemelerin oryndaýǵa kepildik jarııalaıtyn Almaty Deklaratsııasyn qabyldady.

1993 jylǵy jeltoqsanda Dostastyqqa Grýzııa qosyldy, al 2009 jylǵy 18 tamyzda atalǵan birlestikten shyqty. Túrkimenstan TMD-nyń qaýymdastyrylǵan múshesi bolyp tabylady.

Táýelsiz Memleketter Dostastyǵy memleket bolyp tabylmaıdy jáne ultústilik ókilettikke ıe emes. Ol óziniń barlyq músheleriniń egemendi teńdigine negizdelgen jáne 1993 jylǵy 22 qańtardaǵy Jarlyǵy boıynsha is-áreket jasaıdy. Dostastyqtyń múshe memleketteri halyqaralyq quqyqtyń derbes jáne teńquqyqty sýbektileri bolyp tabylady.