Búgin Shymkentten Delıge ushýy tıis ushaq 13 saǵatqa keshigedi

ASTANA. QazAqparat – Búgin saǵat 08:20-da Shymkentten Delıge ushýy tıis FlyArystan áýekompanııasynyń reısi shamamen 13 saǵatqa jýyq keshigedi, dep habarlaıdy QazAqparat tilshisi.

«8 maýsym kúni saǵat 08:20-da oryndalatyn KC7469 Shymkent - Delı reısi óndiristik qajettilikke baılanysty keshiktiriledi. Reıs Shymkent qalasynyń jergilikti ýaqyty boıynsha 8 maýsymda saǵat 21:40-ta ushady dep josparlanyp otyr. Sáıkesinshe, KS7470 Delı - Shymkent reısi Delı ýaqytymen 9 maýsym saǵat 00:50-ge shegerildi», - delingen kompanııanyń Telegram arnasynda jarııalanǵan habarlamada.

Aıta keteıik, zań talaby boıynsha reıs 2 saǵattan artyq keshiktirilgen kezde jolaýshylarǵa sýsyndar, 5 mınýttan aspaıtyn 2 telefon qońyraýyn nemese 2 elektrondy poshta habarlamasyn joldaý múmkindigi usynylady.

Al 4 saǵattan artyq keshiktirilgende ystyq tamaq beriledi.

5 saǵattan asa keshiktirgende bir ret tegin áýe bıletiniń ýaqytyn ózgertý múmkindigi usynylady.