Búgin Oralda «Sherli shejire amanaty» atty halyqaralyq forým bastalady
Qazaqstan halqy BQO assambleıasynan túsken málimetke qaraǵanda, aldymen qalalyq mádenıet jáne demalys saıabaǵynda «Qazaq halqyna myń alǵys» eskertkishi janynda eske alý sharasy ótedi.
Batys Qazaqstan oblystyq qazaq drama teatrynda Qazaqstan halqy Assambleıasynyń «Tarıhtan taǵylym - ótkenge taǵzym» jobasyna arnalǵan ǵylymı eńbekter kórmesi, sondaı-aq «Batys Qazaqstan oblysynyń tarıhy - jasampazdyq pen jetistikter joly» qujattyq-eksponattyq kórmesi ashylmaq.
Qazaq teatrynda «Máńgilik el» - ulttyq tarıh pen tarıhı zerdedegi qubylys retinde» atty halyqaralyq ǵylymı-tájirıbelik konferentsııanyń plenarlyq otyrysy ótedi. Oǵan QR Memlekettik hatshysy Gúlshara Ábdiqalyqova, Qazaqstan halqy Assambleıasy tóraǵasynyń orynbasary, hatshylyq meńgerýshisi Eraly Toǵjanov qatysyp, sóz sóıleıdi dep kútilýde.
Halyqaralyq konferentsııaǵa Qazaqstanmen qatar TMD, AQSh, Ońtústik Koreıa, Chehııa elderinen kelgen ǵalymdar qatyspaqshy. Sektsııalyq otyrystarmen jalǵasatyn konferentsııa sol kúni M.Ótemisov atyndaǵy Batys Qazaqstan memlekettik ýnıversıtetinde qorytyndylanyp, ol tarıhı sabaqtar, kitaptardyń tanystyrylymy, qala jastarymen kezdesý syndy sharalarǵa ulaspaq.
30 mamyrda is-sharalar Syrym aýdanynyń Jympıty aýylynda («Alash» saıabaǵy) jalǵasady. Munda «Alash muratynan - «Máńgilik el» belesine» atty eske alý sharasy bolady. Sondaı-aq múmkindigi shekteýli balalarǵa arnalǵan «QHA: 20 izgi is» qaıyrymdylyq aktsııasy, deportatsııalar, saıası qýǵyn-súrgin qurbandary men Uly Otan soǵysy ardagerlerin eske alýǵa arnalǵan as, «Áıel densaýlyǵy - Ult densaýlyǵy» áleýmettik keńes berý, jastarǵa arnalǵan «Qurmet. Túsinistik. Kelisim» áleýmettik trenıngi, aýdan halqymen «Qoǵamdyq kelisim jáne urpaqtar sabaqtastyǵy» taqyrybynda kezdesý, «Teńdessiz syı» sharasy ótkiziledi.