Búgin men óz-ózimmen jarystym - Tartyl Fest rekordshysy Evgenıı Nam

ASTANA. QazAqparat – Tartyl Fest týrnıriniń grand-fınalynda 80 kelige deıingi salmaq dárejesi boıynsha baq synasqan 30 jastan asqan atletter arasynda úzdik óner kórsetken Evgenıı Nam óz rekordyn jańartqan bolatyn. BAQ ókilderine bergen suhbatynda ol búgingi týrnırde eshkim onyń rekordynan asa almaıtynyna senimdi bolǵanyn aıtty.

«Maqsatym óz rekordymdy jańartý edi. Óıtkeni, bul grand-fınalǵa uzaq daıyndaldym. Árıne, ár sportshy óz rekordyn jańartý úshin ter tógedi. Meniń búgingi maqsatym sol boldy, ıaǵnı óz-ózimmen jarystym», - deıdi atlet.

Ázirge Evgenıı Namnyń kórsetkishi týrnırdiń rekordy bolyp tur.

«Bizden keıin áli eki top óner kórsetedi. Biraq, olar meniń rekordymdy buza almaıdy. Olaı bolatynyna senbeımin. Óıtkeni, salmaqtary aýyr. Uıymdastyrýshylar osy týrnırdiń jeńimpazdaryn álem chemıponatyna aparatyndaryn aıtqan. Endi álem boıynsha úzdik kórsetkishke qol jetkizgim keledi», - deıdi sportshy.

Eske salsaq, QR Prezıdenti janyndaǵy «DARA» talanttardy qoldaý qorynyń bastamasymen uıymdastyrylǵan týrnırdiń aqtyq synyna óńirlik irikteý jarystarynda úzdik nátıje kórsetken 170 sportshy qatysady. Qatysýshylardyń jasy – 11-51 jas aralyǵynda.

Týrnıkke tartylý jarysy byltyr Qazaqstannyń 20 qalasynda ótti. Onda 7 myńnan astam qazaqstandyq 9 salmaq dárejesinde saıysqa túsip, 33 jastaǵy tarazdyq Evgenıı Nam 50 ret kórsetkishpen týrnır rekordyn ornatqan.

EXPO aýmaǵyndaǵy Kongress ortalyqta ótip jatqan grand-fınaldan «Jibek Joly» telearnasy tikeleı kórsetilim taratady.

Grand-fınaldyń jalpy júlde qory – 54 mln teńge. Óz salmaq dárejesi boıynsha 1-oryn alǵan jeńimpazdarǵa 3 mln teńge, 2-oryn alǵandarǵa 2 mln teńge, 3-oryn ıelengenderge 1 mln teńge syıaqy beriledi.

Bul grand-fınalda chempıon atanǵandar Street Workout boıynsha álem chempıonatynda Qazaqstan atynan saıysqa túse alady.