Búgin – medıtsına qyzmetkerleri kúni
1998 jyly Prezıdent Jarlyǵymen bekitilgen bul mereke jyl saıyn maýsymnyń úshinshi jeksenbisinde atap ótiledi. Degenmen, bul datanyń tarıhy áride. Naqtyraq aıtsaq, 1980 jyldyń 1 qazandaǵy Joǵarǵy keńes tóralqasynyń qaýlysymen medıtsına qyzmetkerleriniń kúni resmı bekitilgen. Keńes odaǵy ydyraǵannan keıin onyń quramyndaǵy kóptegen elder bul merekeden bas tartty. Biraq, Belarýs, Armenııa, Moldova, Ýkraına, Reseıde bul kún áli de atalyp ótedi.
Osy kásibı merekege oraı jaýapty mindet arqalaǵan mamandardy Memleket basshysy Qasym-Jomart Toqaev quttyqtady.
«Qurmetti medıtsına qyzmetkerleri! Barshańyzdy kásibı merekelerińizben shyn júrekten quttyqtaımyn! Sizder halyqtyń densaýlyǵyn jaqsartyp, ult sapasyn arttyrýǵa zor úles qosyp kelesizder. Qazaqstanda medıtsına mamandarynyń mártebesi men bedeli joǵary bolý úshin barlyq jaǵdaı jasalýda. Memleket densaýlyq saqtaý salasyna árdaıym aıryqsha kóńil bóledi. Kóptegen zamanaýı emdeý oryndarynyń salynýy, bilikti mamandardy daıarlaýǵa bólinetin grant sanynyń kóbeıýi, osy sala qyzmetkerlerine áleýmettik qoldaý kórsetilýi - sonyń aıqyn dáleli. Túptep kelgende, munyń bári salaýatty qoǵam qalyptastyrýǵa yqpal etedi.
Sizder syndarly sátterde óz mindetterińizdi abyroımen atqaryp, el senimin aqtaı bildińizder. Barshańyzǵa qajyrly eńbekterińiz úshin shynaıy rızashylyǵymdy bildiremin. Sizderge amandyq, baq-bereke tileımin!», - delingen Prezıdenttiń quttyqtaýynda.
Alaıda, Abaı oblysyndaǵy órt oqıǵasyna baılanysty bıyl bul merekeni atap ótý keıinge shegerildi. Densaýlyq saqtaý mınıstrliginen málimdegendeı, «DENI SAU ULT» sammıtin ótkizý jáne jyl saıynǵy «ALTYN SHIPAGER» Ulttyq medıtsınalyq júldesiniń tabystaý keıinge qalady.
Jalpy, sońǵy birneshe jylda medıtsına salasyn Úkimet tarapynan qoldaý kúsheıdi. Mańyzdylarynyń biri – sala mamandarynyń jalaqysy. Mınıstr Ajar Ǵınııattyń málimetinshe, bıyldan bastap dárigerlerdiń aılyǵy orta eseppen 531 myń teńgege deıin, orta medıtsına personalynyń eńbekaqysy 250 myń teńgege deıin kóterilmek.
Sonymen qosa, medıtsına boıynsha bilim alyp jatqan stýdentterdiń shákirtaqysy da ósedi.
Atap aıtqanda, memlekettik bilim berý tapsyrysy boıynsha oqıtyn stýdentterge aı saıynǵy shákirtaqy myna mólsherde belgilendi:
- «Densaýlyq saqtaý» baǵyty boıynsha bilim alatyn stýdentterge (bakalavr) – 67 200 teńge;
- «Densaýlyq saqtaý» baǵyty boıynsha bilim alatyn rezıdent-dárigerlerge jáne magıstranttarǵa – 111 579 teńge.
- «Densaýlyq saqtaý» baǵyty boıynsha bilim alatyn doktoranttarǵa – 217 500 teńge;
Sondaı-aq, byltyr jelotoqsanda Májilis medıtsına qyzmetkerleriniń kásiptik jaýapkershiligin saqtandyrýǵa qatysty qujatty maquldady. Endi oǵan ilespe erejeler bekitilýi tıis. Jańa ózgeriske saı, densaýlyq saqtaý uıymy kásibı jaýapkershiligin saqtandyrý shartyn jasaspaı, mamandy jumysqa ala almaıdy.
Taıaýda kópshilik talqylqyǵa shyǵarylǵan erejede qandaı jaǵdaılar saqtandyrýǵa jatatyny jazylǵan.
«Medıtsınalyq qyzmetti júzege asyrý nátıjesinde densaýlyq saqtaý sýbektisiniń jáne medıtsına qyzmetkeriniń patsıentke ómiri men densaýlyǵyna zııan keltirýi boıynsha oqıǵa saqtandyrý jaǵdaıy dep tanylady», - delingen saqtandyrý erejesinde.