Búgin - Kedeıshilikke qarsy kúres kúni: BUU balalarǵa jaǵdaı jasaýǵa shaqyrdy

NUR-SULTAN. QazAqparat – Birikken Ulttar Uıymy álem memleketterin balalarǵa jaıly ómir jaǵdaıyn jasaýǵa shaqyrdy. Bul týraly BUU jańalyqtar saıtynda jarııalandy, dep habarlaıdy QazAqparat.

Búgin - Kedeılikti joıý jolyndaǵy halyqaralyq kúres kúni. BUU Damý baǵdarlamasynyń derekterine súıensek, búginde shamamen 1,3 mlrd adam joqshylyqtyń taýqimetin tartyp otyr. Ásirese kedeı otbasylardaǵy balalardyń jaǵdaıy janǵa batady.

Kedeıshilikke qarsy kúres kúniniń bıylǵy taqyryby – balalar. 30 jyl buryn qabyldanǵan Bala quqyqtary týraly konventsııada ár balanyń aqyl-oı, dene jaǵynan, rýhanı, moraldyq jáne áleýmettik damýyna kepildik beriledi. Biraq álemdegi balalardyń barlyǵy birdeı jaıly ómir súrip otyrǵan joq.

«Balalardyń joqshylyq qamytyn kııýi urpaqtan-urpaqqa jalǵasyp kele jatqany shyndyq. Eger biz aldymyzǵa aýqymdy mindetter qoımasaq, búgingi balalar erteń klımat ózgerýiniń zor saldaryn kóredi», - dep málimdedi BUU Bas hatshysy Antonıý Gýterrısh.

Onyń aıtýynsha, qaqtyǵys aımaqtarynda da, kıberkeńistikte de, májbúrli túrde eńbekke jegý jáne jynystyq paıdalanýǵa baılanysty jaǵdaılarda da kishkentaı qyzdar asa zardap shegip keledi. «Biraq ózgeristerdiń qozǵaýshy kúshi – solar ǵoı», - deıdi BUU basshysy.

A. Gýtıerrısh qyzdardy oqytýǵa kúsh salý – olardy kedeılik pen qaýip-qaterden qutqarý úshin asa mańyzdy ekendigin aıtady.

BUU Bas hatshysy álem memleketterin otbasy múddelerine, atap aıtqanda ata-analardyń bala kútimine durys ýaqyt bólýine baǵyttalǵan saıasat júrgizýge shaqyrady.