Búgin qazaqstandyq desantshylardyń kásibı merekesi
2000 jylǵy 6 shildede Memleket basshysynyń Jarlyǵymen QR Qarýly kúshterinde utqyr kúshter quryldy, olar keıin aeroutqyr áskerleri bolyp ózgerdi. Al 2017 jyly zaman talabyna saı desanttyq-shabýyldaý áskerleri bolyp qaıta jasaqtaldy.
Qazirgi ýaqytta desanttyq-shabýyldaýshy áskerler – joǵary mobıldi jáne sońǵy úlgidegi tehnıkamen jabdyqtalǵan, negizgi kúshterden, onyń ishinde jaý tylynda basqa da tapsyrmalardy óz betinshe oryndaýǵa qabiletti ásker tegi. Olardyń jaýyngerlik qýatyn desanttyq-shabýyldaý, artıllerııalyq, barlaý, bitimgerlik quramalary, bólimder men bólimsheler quraıdy.
Desanttyq-shabýyldaý áskerleri barlyq oqý-jattyǵýlarǵa, sonyń ishinde halyqaralyq jattyǵýlarǵa únemi qatysady. Atap ótsek, olar armııa halyqaralyq oıyndarynda nátıjeli óner kórsetip júr. Desantshy-jaýyngerler árdaıym ózderiniń joǵary daıyndyq deńgeıin, kásibı sheberlikterin, asa kúrdeli tapsyrmalardy oryndaýǵa qabilettiligin kórsetip keledi.
Áýe-desanty daıyndyǵy – bul ásker teginiń mańyzdy quramdas bóligi. Kók tarlandary kúndiz de, túnde de, tipti kúrdeli meteorologııalyq jaǵdaılarda da parashıýtpen sekirý tapsyrmasyn oryndaıdy.
Bitimgerlik qyzmet atqarýda da desanttyq-shabýyldaý áskerleriniń qosqan úlesi zor. «Qazpolk» áskerı qyzmetshileri 2003-2008 jyldar aralyǵynda Iraktaǵy bitimgerlik mıssııaǵa qatysty. 2018 jyldan bastap «Qazpolk» jáne «Tilendıev» bitimgerlik daıyndyq ortalyǵy bazasynda qazaqstandyq bitimgerlerdi, BUU-nyń Lıvandaǵy ýaqytsha kúshter kontıngentiniń quramynda mıssııalarǵa qatysý úshin daıarlaý júrip jatyr.
Desanttyq-shabýyldaý áskerlerinde qyzmet etý qashanda abyroıly mindet. Bólimder men bólimshelerdi jasaqtaýǵa qatań irikteý júrgiziledi. Munda otan aldyndaǵy boryshyn óteýge kelgen merzimdi áskerı qyzmetshilerdiń sporttyq razrıadtary bar jáne psıhologııalyq turaqtylyq deńgeıi joǵary.
Desantshylar qandaı tapsyrmalardy oryndasa da, anyq ári sheber is-qımyl jasap, batyldyq pen eptilik kórsetetin, shydamdylyǵy men jaýyngerlik mashyǵy myqty, kez kelgen sátte egemen Qazaqstandy qorǵaýǵa ázir naǵyz jaýyngerler.