Búgin QazAqparat agenttiginiń qurylǵanyna - 97 jyl
Ǵasyrǵa jýyq ýaqyttan beri beri saıasat, ekonomıka, bilim berý, densaýlyq saqtaý, sport, mádenıet jáne qoǵamnyń ózge de tynys tirshiligi týraly jedel ári senimdi aqparat taratyp kele jatqan QazAqparat eń alǵash 1920 jyly ROSTA-nyń Orynbor-Torǵaı bólimshesi negizinde quryldy.
1925 jyly agenttik aty QazROST bolyp ózgertildi. 1937 jyly QazTAG degen atpen Qazaq KSR Mınıstrler Keńesiniń qaraýyna berildi.1997 jyly qyrkúıek aıynda Qazaqstan Respýblıkasy Prezıdentiniń №3629 Jarlyǵymen «Qazaq aqparat agenttigi (QazAA)» respýblıkalyq qazynalyq kásiporny bolyp ózgertildi. 2002 jyly qarashanyń 8-inde, Qazaqstan Respýblıkasy Úkimetiniń №1186 qaýlysyna sáıkes QazAAG negizinde «Qazaq aqparat agenttigi» Ulttyq kompanııasy («QazAqparat» UK) quryldy. 2008 jyly shildeniń 3-inde Qazaqstan Respýblıkasy Úkimetiniń №668 qaýlysyna sáıkes «Arna Medıa» Ulttyq aqparattyq holdıngi» aktsıonerlik qoǵamynyń quramyna kirdi. 2012 jylǵy tamyzdan 2014 jylǵa deıin «Qazaqstan» RTRK» AQ quramynda boldy. 2014 jyldyń qańtarynda «QazAqparat» Qazaqstandaǵy alǵashqy halyqaralyq aqparat agenttigi (HAA) mártebesine ıe bolyp, óz tarıhynyń jańa kezeńin bastady.
Agenttiktiń ortalyq keńsesi Qazaqstannyń elordasy Astana qalasynda ornalasqan. Eldiń qarjylyq jáne mádenı ortalyǵy Almatyda onyń fılıaly - tilshiler qosyny bar. QazAqparatta ózge otandyq aqparattyq agenttikterde joq tilshiler jelisi bar. Eldiń barlyq aımaqtarynda 15 tilshiler pýnkti ornalasqan. Onyń ishine Baıqońyr da kiredi. Reseı, Qytaı, Túrkııa, BAÁ, Iordanııa, Belgııa, Ázirbaıjan, Ózbekstan elderinde menshikti tilshileri bar. Sondaı-aq, QazAqparat sheteldik ITAR-TASS, KABAR, BelTA, ÝkrInform, «NOVOSTI - MOLDOVA» aqparattyq agenttigi, MOLDPRES, Armenpress, AzárTAc, Yonhap, EFE, BTA jáne t.b. agenttiktermen seriktestik ornatqan. Bul elimizde jáne álemde bolyp jatqan jańalyqtardy on-line rejımde jedel ári shynaıy taratýǵa múmkindik beredi.
Sonymen birge, QazAqparat - kırıllıtsany oqı almaıtyn shetelde turatyn qandastarymyz úshin latyn (2004) jáne tóte jazýda (2009) habar taratqan alǵashqy qazaqstandyq BAQ. Odan bólek, agenttik qazaq, orys, aǵylshyn jáne qytaı tilderinde habar taratady.
Búgingi tańda QazAqparat áleýmettik jelilerde belsendi jumys júrgizedi. Facebook, Moı mır, VKontakte, Twitter, Instagram áleýmettik jelilerindegi arnalar men paraqshalaryna jazylýshylardyń jıyntyq sany 80 000 adamnan asyp túsedi. www.inform.kz portalyn paıdalanýshylardyń geografııasy 229 eldi qamtıdy.