Búgin - qazaq jazýshysy, belgili satırık Ospanhan Áýbákirovtiń týǵan kúni

ASTANA. QazAqparat - 82 jyl buryn (1934-1986) qazaq jazýshysy, belgili satırık Áýbákirov Ospanhan dúnıege keldi. Almaty oblysynyń Jambyl aýdanyndaǵy Úshbulaq aýylynda týǵan.

Qurmanǵazy atyndaǵy Qazaq memlekettik konservatorııasynyń teatr fakýltetin tamamdaǵan. Mamandyǵy akter bolǵanymen, óziniń shyǵarmashylyq muratyn satıradan tapqan.

Ol respýblıkalyq gazetterde, «Ara» jýrnalynda qyzmet istegen. Satıralyq janrmen birge, balalarǵa arnalǵan óleńjyr, ertegi, pesa, belgili kompozıtorlardyń ánderine mátin jazýmen, aýdarmamen de aınalysqan. Ázız Nesınniń «Ahıretten kelgen hattary», Branıslav Nýshıchtiń «Meniń ómirbaıanym», Lao Sheniń «Mysyqtar qalasyn», E.Rapkeniń «Mıýnhaýzenniń hıkaıalaryn» qazaq oqyrmandaryna usynǵan.

1983 jyly balalarǵa arnalǵan «Qaǵaz qalpaq» satıralyq jınaǵy úshin Qazaqstan Jazýshylar odaǵynyń syılyǵy berildi.