Búgin «Qazaq eli» monýmentiniń aldyndaǵy alańda Elbasy elimen birge Naýryzdy toılaýda - VIDEO
Tap qazirgi ýaqytta qazaqstandyq estrada juldyzdary, bı ujymdary, halyq mýzykalyq aspaptar orkestri óz ónerlerin kórsetip jatyr.
Bas sahnanyń tórinde halyq mýzykalyq aspaptar orkestri qazaq kompozıtorlarynyń shyǵarmalaryn oryndady.
Merekege jınalǵan halyqty eliktirgen shoýdyń negizgi bóligi «Qasıetti kóktem» degen teatrlandyrylǵan qoıylym boldy. Onda astanalyqtar men qala qonaqtary Jer-ananyń býsanyp, qar sýynyń jylǵalardan syldyraı aqqanyn, alǵashqy báısheshektiń búr jarǵanyn tamashalady. Sahna birtindep qozǵala otyryp, naǵyz tabıǵattyń oıaný qubylysyn kóptiń kóz aldyna ákeldi. Sahnada saltanat qurǵan shoý kógildir aspan aıasymen astasyp, jınalǵandarǵa kóktemniń shýaqty sátterin syılady. Aqan seriniń ónerpazdarmen qosa quıqyljyǵan úni kóktemnen habar ala kelgendeı. Biraq osy sátte tátti kórinis sap tıylyp, aspandy qara bult torlap, tóńirek aq qarǵa oranady. Alaıda kóktem arý zańdy bıligin qaıta óz qolyna alady. Sóıtip, aınala qaıta jadyrap sala berdi.
Kontserttik baǵdarlamaǵa T.Asar, A.Okapov, «MýzART», «Jigitter», «KeshYOU», «Qońyr», «Assyl», «The Jigits» toptary, D.Qudaıbergen, «Sazgen Sazy» folklorlyq ansambli, «Shattyq», «Saltanat», «Wake-up», «Bahyt» bı ujymdary, «Eligaı» balalar hory qatysýda. Barlyq nomerlerge bı ujymdary tartylǵan jáne ekrandarda biregeı 3D kompozıtsııa kórsetilýde.
Ártister qazirgi zamanǵy shyǵarmalardan basqa, halyqtyq mýzyka mádenıetiniń negizgi án aıtý mektebiniń dástúrli ánderin de shyrqaýda. Kontserttik baǵdarlamaǵa barlyǵy 1 myńnan astam adam tartylǵan.
Sonymen qatar, shaǵyn sahnada kópshilik nazaryna tsırk baǵdarlamasy, ulttyq salt-dástúrler men ádet-ǵuryptar usynylýda. Al dóńgelek sahnada 22 adamnan quralǵan estradalyq-sımfonııalyq orkestr ornalasqan.
Budan basqa, alańda sport jarystaryn (arqan tartý, armreslıng, gir kóterý, toǵyzqumalaq jáne t.b.) ótkizýge arnaıy jer bólingen.