Búgin fýtboldan Premer-lıga komandalarynyń besinshi týry bastalady

ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 5-týry bastalady, dep habarlaıdy QazAqparat tilshisi.

Atalǵan týr 8 jáne 9 sáýir kúnderi ótedi. Búgin, 8 sáýirde 4 oıyn bolsa, 9 sáýirge qalǵan 3 kezdesý belgilengen.

Búgin, 8 sáýirde saǵat 14:00-de «Oqjetpes» (Kókshetaý) pen «Aqsý» (Pavlodar oblysy) besinshi týrdyń shymyldyǵyn túredi. Odan keıin 16:00-de «Qyzyljar» (Petropavl) men «Atyraý», 17:00-de «Maqtaral» (Túrkistan oblysy) men «Kaspıı» (Aqtaý), 20:00-de «Qaısar» (Qyzylorda) men «Shahter» (Qaraǵandy) kezdesedi.

Al 9 sáýir kúni, saǵat 17:00-de «Qaırat» (Almaty) pen «Jetisý» (Taldyqorǵan), 19:00-de «Tobyl» (Qostanaı) men «Astana» jasyl alańǵa shyǵady.

Atalǵan týrdy saǵat 21:00-de «Ordabasy» (Shymkent) men «Aqtóbe» komandalary túıindeıdi.

Eske salsaq, tórt týrdan keıin «Qyzyljar» týrnır kestesinde kósh basynda keledi.