Búgin elimizdiń basym bóligine qar jaýady, burqasyn bolady – aýa raıy boljamy
06:00, 21 Aqpan 2023
ASTANA. QazAqparat – «Qazgıdromet» RMK-sy 21-shi aqpan kúngi aýa raıy boljamyn jarııalady, dep habarlaıdy QazAqparat.
Kásiporynnyń boljamyna qaraǵanda, atlantıkalyq tsıklon jyrasynyń jáne onymen baılanysty atmosferalyq aǵyndardyń áserinen elimizdiń basym bóliginde kún qubylmaly bolady.
Naqtyraq aıtqanda, qar jaýyp, burqasyndatady. Batys jáne shyǵys aýdandarda jáne ońtústikte jańbyr men qar jaýady. Tek elimizdiń ońtústik-shyǵysynda jáne ońtústiginde ǵana kún jaýyn-shashynsyz bolady. QR boıynsha kóktaıǵaq bolyp, jel kúsheıedi, tuman túsedi.
Kúndiz Qostanaı oblysynyń soltústiginde qalyń qar túsedi.