Búgin elimizde respýblıkalyq referendým ótedi

NUR-SULTAN. QazAqparat – Búgin elimizde respýblıkalyq referendým ótedi. Referendým barysynda el turǵyndary Konstıtýtsııamyzdyń 33 babyna 56 ózgeris engizý máselesine qatysty óz daýystaryn beredi, dep habarlaıdy QazAqparat tilshisi.

Respýblıka boıynsha 10 013 referendým ýchaskesi iske qosylady. Al respýblıkalyq referendýmǵa qatysý quqyǵy bar azamattardyń tizimi 11 mln 722 myń 536 adamdy quraıdy. Sonymen qatar QR Syrtqy ister mınıstrligi 52 shet memlekettegi Elshilikterimizdiń janynan 65 ýchaskelik referendým komıssııasyn qurdy. Olarda shetelde júrgen Qazaqstannyń shamamen 11 350 azamaty daýys bere alady.

Konstıtýtsııalyq referendým ótkizýge respýblıkalyq bıýdjetten 16 mlrd 400 mln teńge bólindi.

Bul shyǵystardyń 79 paıyzy komıssııa músheleriniń jalaqysyn tóleýge baǵyttalady. Al qalǵan 21 paıyzy daýys berý ýchaskeleriniń metarıaldyq-tehnıkalyq qamtamasyz etilýine, Ortalyq referendým komıssııasy men ýchaskelik ári aýmaqtyq komıssııasynyń jumysyna, baspa ónimderin daıarlaýǵa, aqparattyq súıemeldeýge, sondaı-aq el aýmaǵynda arnaıy bılbordtar ornalastyrýǵa arnalǵan.