Búgin Ekibastuzda 11 úı ýaqytsha jylýdan ajyratylady

EKІBASTUZ. QazAqparat – Búgin Ekibastuzda úılerdi apattan keıin júrgizilgen jylý jelisine qosý maqsatynda 7 jeke jáne 4 kópqabatty turǵyn úı jylýdan ajyratylady. Bul týraly shahar ákimdiginiń áleýmettik jelidegi resmı paraqshasynan málim boldy, dep habarlaıdy QazAqparat tilshisi.

«Ekibastuz qalasynda jylý beriletin jabdyqtaý parametrlerin turaqtandyrý jáne jylý jelilerin jóndeý, qalpyna keltirý jumystary jalǵasýda. Osyǵan baılanysty 18 qańtarda Pavlov kóshesi, 80 mekenjaıynan bastap Bezymıannyı kóshesine deıingi ýchaskedegi jylý jelisine qosý úshin 10:00-12:00 aralyǵynda 7 jeke turǵyn úıdi jylýmen jabdyqtaý jelisinen ajyratý josparlanǵan. Sonymen qatar, Qonaev kóshesi 138 úı baǵytyndaǵy oramishilik jylý jelisi ýchaskesindegi jerasty tósemindegi zaqymdanýdy joıý úshin saǵat 09:00-20:00 aralyǵynda 4 kópqabatty turǵyn úı men 1 zańdy tulǵa jylýmen jabdyqtaýdan ajyratylady», - delingen ákimdiktiń Іnstagram paraqshasynda jarııalanǵan habarlamada.

Aıta keteıik, birneshe kún buryn Ekibastuzda jóndeýge baılanysty eki áleýmettik nysan men 48 jeke úı ýaqytsha jylýdan ajyratylǵan edi.

Eske sala keteıik, ótken jyly 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.

28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.

Bas prokýratýra Ekibastuzdaǵy apatty tergeý eki aıǵa deıin sozylatynyn málim etti.

Sonymen qatar, Úkimettiń keńeıtilgen otyrysyna qatysqan Prezıdent Qasym-Jomart Toqaev Ekibastuz turǵyndaryna jylý jelisindegi apattyń shyǵyndaryn memleket pen JEO ıesi bólip tólesin dep tapsyrma bergen edi.