Búgin EAEO Kedendik kodeksi óz kúshine endi

ASTANA. QazAqparat - 2018 jyldyń 1 qańtarynda Eýrazııalyq ekonomıkalyq odaqtyń 2017 jyly 11 sáýirde Kedendik kodeks týraly bekitken Sharty óz kúshine endi, dep habarlaıdy QazAqparat Eýrazııalyq ekonomıkalyq komıssııasynyń baspasóz qyzmetine silteme jasap.

Buǵan deıin Eýrazııalyq ekonomıkalyq odaqtyń bes memleketi EAEO Kedendik kodeks týraly Shartty ratıfıkatsııalap, Eýrazııalyq ekonomıkalyq komıssııasyna halyqaralyq sharttyń kúshine enýine qajetti ishki memlekettik protsedýralardy atqarý týraly habarlama jibergen edi.

Eýrazııalyq ekonomıkalyq odaqtyń 2017 jyldyń 11 sáýirinde bekitken Kedendik kodeks týraly Sharty iske asqan sátte Kedendik odaqtyń 2009 jyly 27 qarashada bekitken Kedendik kodeks týraly Kelisimi men Odaq aıasyndaǵy kedendik quqyqtyq qatynastardy rettegen ózge de halyqaralyq kelisimder óz kúshin joıady.

Aıta keteıik, 2017 jyldyń 11 qańtarynda Eýrazııalyq ekonomıkalyq odaqtyń Kedendik kodeks týraly Shartyna qol qoıyldy.

EAEO Kedendik Kodeksi odaqtyń syrtqy ekonomıkalyq qyzmetin retteý júıesin tsıfrlandyrýǵa zańnamalyq negiz qalaıdy. Kodekstiń negizgi jańalyqtary ishinde - elektrondy deklaratsııaǵa kóshý, syrtqy ekonomıkalyq qyzmet qatysýshylarynyń keden organdarymen ınternet arqyly baılanysýy, deklaratsııalardy tirkeýden taýardy erkin aınalymǵa jiberýge deıingi sheshimderdi qabyldaý fýnktsııasyn kedendik ınspektorlardan kedendik organnyń aqparattyq júıesine berý jáne t.b. bar.