Búgin Dúnıejúzilik kóshpendiler oıyndary bastalady
Aıtýly sharaǵa 23 sport túrinen medaldar sarapqa salynady. Oǵan álemniń 100-ge jýyq elinen sportshylar qatysady dep kútilip otyr.
Jalpy jarysta 23 sport túri qamtylǵan.
Elimizdiń atynan atalǵan básekede qazaq kúresi, kókpar, kókbóri, jamby atý, dástúrli sadaq atý sport túrleri boıynsha 53 sportshy jarys jolyna shyǵady.
Kókpardan QR ulttyq qurama sapynda álem chempıondary Ulan Baıtóreev (komanda kapıtany), Abylaıhan Nyshanbekov, «ǵasyr oıynshysy» atanǵan Qurmanbek Turǵanbek syndy oıynshylar el namysyn qorǵaıdy.
Buryn kókbóri (qyrǵyz kókpary) resmı túrde sporttyq saıys túrleri qatarynda joq bolatyn. Jobanyń avtory retinde sanalatyn Qyrǵyzstan suranysymen ol sońǵy kúnderi engizilip, oǵan elimizdiń atynan qatysýshylar daıyndaldy.
Qazaq kúresinen 6 salmaq dárejesi boıynsha júldeler sarapqa salynady. Olardyń 3-i salmaq erler, 3-i áıelder arasynda bolady.
Balýandar arasynda «Qazaqstan barysy» respýblıkalyq týrnıriniń jeńimpazy Maqsat Isaǵabylov ta bar.
Jamby atý sporty boıynsha ulttyq qurama músheleri - tuńǵysh Álem chempıony Eralhan Aıkóz, Álem chempıony Abzal Týlybekov, Azııa chempıony Baqdáýlet Babajan jarys jolyna shyǵady.
Dástúrli sadaq atýdan Dıas Ahmetov (QR kýboginiń jeńimpazy), Erbol Tápenov (Álem kýboginiń kúmis júldegeri), Anjela Tarytsa (Álem kýboginiń jeńimpazy) bar.
Dúnıejúzilik kóshpendiler oıyndary 2014 jyldan beri turaqty túrde ótkizilip keledi. Alǵashqy úsheýi Qyrǵyzstannyń Sholpon-Ata qalasynda uıymdastyryldy.
Atalǵan jarysqa 2014 jyly - 19, 2016 jyly - 60, 2018 jyly - 66 memleketten sportshylar keldi.
2014-2018 jyldar aralyǵynda qazaqstandyq sportshylar barlyǵy 138 (40 altyn, 46 kúmis, 52 qola) medal alyp, jalpy esepte ekinshi orynda tur.
Kósh basynda Qyrǵyzstan - 237 (81-77-79) medalmen kósh bastap tursa, úshinshi oryndaǵy Reseıde - 88 (29-17-42) medal bar.