Búgin – Dúnıejúzilik qan donory kúni

ASTANA. QazAqparat – Dúnıejúzilik qan donory kúnin Dúnıejúzilik densaýlyq saqtaý uıymy belgiledi jáne ol jyl saıyn 14 maýsymda atap ótiledi, dep habarlaıdy QazAqparat.

Densaýlyq saqtaý mınıstrligi baspasóz qyzmetiniń málimetinshe, Dúnıejúzilik donorlar kúni alǵash ret 2005 jyly atalyp ótken.

Dúnıejúzilik donorlar kúnin ótkizý ıdeıasy qan donorlaryn taný jáne alǵys aıtý, sondaı-aq qaýipsiz qan men onyń komponentteriniń ómirdi saqtap qalýdaǵy mańyzy týraly habardar etý maqsatynda paıda boldy.

Qan donorlary qoǵamda mańyzdy ról atqarady. Olar qan quıýdy qajet etetinderdiń densaýlyǵy men ál-aýqatyna úles qosady. Bul kóptegen adamnyń ómirin saqtap qalýǵa kómektesedi jáne qıyndyqtar men aýrýǵa tap bolǵandarǵa úmit beredi.

Jyl saıyn Dúnıejúzilik donorlar kúni qan tapsyrýdyń naqty aspektilerine baǵyttalǵan erekshe taqyrypqa ıe. Osy jyldyń basty taqyryby – «Qan jáne qan plazmasyn tapsyryńyz, ómir syılańyz jáne ony jıi jasańyz».

Bul kúni búkil álemde qan tapsyratyn adamdar atap ótilip, alǵys aıtylady. Barlyq muqtaj jandy qaýipsiz qan ónimderimen qamtamasyz etý úshin erikti óteýsiz turaqty qan men plazma donorlyǵynyń mańyzy zor.

Qan donory bolý – qoǵamnyń densaýlyǵy men ál-aýqatyna úles qosatyn batyr bolý.

Jyl saıyn Dúnıejúzilik donor kúninde barlyq qazaqstandyq qan ortalyqtary merekelik is-sharalar, qurmet kórsetý, qan donorlaryna arnalǵan kontsertter uıymdastyrady. 40 donatsııaǵa jetken donorlar tósbelgilermen, Densaýlyq saqtaý mınıstrliginiń, jergilikti atqarýshy organdardyń alǵys hattarymen marapattalady. Donatsııalar sany az belsendi donorlar da qan ortalyqtarynyń gramotalarymen marapattalady.