Búgin – Buqaralyq aqparat quraldary qyzmetkerleri kúni
Jýrnalıstıka – BAQ quraldarynyń (ınternet, baspa, radıo, televıdenıe, saıt) kómegimen aqparatty jınaý, óńdeý jáne taratý jumysy. Jýrnalıstıkanyń ǵylymı tártibi baspanyń dúnıege kelýimen tikeleı jolǵa qoıylǵan. Al HІH ǵasyrdyń ekinshi jartysy men HH ǵasyrdyń basynda foto men kınojýrnalıstıka ómirge kelip, salaǵa tyń tynys ákeldi. Іzinshe 1920-1940 jyldary radıo men telejýrnalıstıkanyń dáýiri bastaldy.
Al bizdiń tarıhshylar jalpy qazaq dalasynda jýrnalıstıkanyń negizi HІH ǵasyrdyń sońy men HH ǵasyrdyń basynda qalanǵanyn aıtady. «Túrkistan ýálaıatynyń gazeti», «Dala ýálaıatynyń gazeti», «Kırgızskaıa stepnaıa gazeta», «Qazaqstan» gazeti, «Aıqap» jýrnaly, «Serke» gazeti... Jalpyulttyq sıpat pen suranysqa ıe bolǵan «Qazaq» gazeti jaryqqa shyqqanǵa deıin atalǵan basylymnyń barlyǵy birde úkimet qysymymen, birde qarjy tapshylyǵynan jabylyp jatty. «Qazaq jýrnalıstıkasynyń atasy» atanǵan Muhametjan Seralınder de sol tusta eńbek etkenin atap ótý kerek.
HH ǵasyrdyń basyndaǵy basylymdardyń ishinde Alash zııalylary shyǵarǵan ulttyq ıdeıanyń shyraqshysy, azattyq rýhynyń qońyraýy atanǵan «Qazaq» gazetiniń shoqtyǵy bıik. 1905 jylǵy «Qarqaraly petıtsııasynda» qoıǵan talaptardyń biri (petıtsııanyń 3 taraýy) - «qazaq tilinde gazetter basyp shyǵarý qajettigi» bolatyn. Alash azamattarynyń maqsaty oryndalyp, 1913-1918 jyldary «Qazaq» gazetiniń 265 nómiri jaryqqa shyqty. Keıbir málimetterge qaraǵanda, «Qazaq» gazetiniń taralymy alǵashynda 3 myń dana bolsa, keıinnen ol 8 myń danaǵa jetip, ulttyq mıssııany oryndaýǵa ólsheýsiz eńbek sińirdi.
2019 jyly Úkimettiń tıisti Qaýlysy jarııalanyp, 28 maýsym kúni Buqaralyq aqparat quraldary qyzmetkerleriniń merekesi atalyp ótetin boldy. Onyń aldynda Prezıdent Qasym-Jomart Toqaev jýrnalısterdiń kásibı merekesin bekitý jóninde Úkimetke tapsyrma bergen bolatyn.
Atap aıtqanda, bıyl 27 maýsym kúni Memleket basshysy buqaralyq aqparat quraldary salasyndaǵy syılyqtar men granttar tapsyrdy.
«Ózderińizge málim, osyǵan deıin meniń Jarlyǵymmen bul meıram Buqaralyq aqparat quraldary qyzmetkerleriniń kúni bolyp belgilendi. Otandyq medıa jańa kezeńge qadam basty. Qazir aqparat taratý jyldamdyǵy, onyń mazmuny, quraly – bári óte tez ózgerip jatyr.
«Sóz túzeldi, tyńdaýshy, sen de túzel» dep hakim Abaı aıtpaqshy, jýrnalıstiń osy ózgeristerge beıimdelýi óte mańyzdy. Keshe ǵana dástúrli jáne jańa medıanyń básekesi týraly sóz qozǵalýshy edi.
Al búgin sol saıttardy áleýmettik jeliler, messendjerler, platformalar aqparat alańynan yǵystyryp jatyr», - dedi Qasym-Jomart Toqaev.
Prezıdent aqparattyq qaýipsizdikti qamtamasyz etý úshin Úkimet te, medıa menedjerler de osy ózgeristerge daıyn bolýy qajet ekenin aıtty.
«Búginde Qazaqstan Ortalyq Azııa aımaǵynda kóshbasshy memleketke aınaldy. Biz kóptegen salalar boıynsha alda kelemiz. Biraq toqmeıilsip otyrýǵa bolmaıdy. Biz bir el bolyp tabandy eńbek etýimiz kerek. Qazaqstan ozyq eldermen qatar turatyn básekege qabiletti memleketke aınalýy qajet. Osy mindetti júzege asyrý jolynda sizderdiń, ıaǵnı jýrnalısterdiń róli aıryqsha. Medıamamandary halyqqa shynaıy aqparat berip, elimizdegi ahýaldy azamattarǵa jan-jaqty túsindirip otyrýy kerek. Bul – asa mańyzdy mindet. Qazir otandyq aqparat quraldarynyń halyqaralyq deńgeıde belsendilik tanytatyn kezi keldi», - dedi Qasym-Jomart Toqaev.
Prezıdent atalǵan mindetti iske asyrý úshin jańa medıa menedjment, shetelden aqparat taratatyn bilikti jýrnalıster, tyń tehnologııa jáne sapaly ınfraqurylym qajet ekenin alǵa tartty.
«Bul – ýaqyt talaby. Ony oryndaýymyz shart. Osy rette álemdik medıa korporatsııalardyń oń tájirıbesin eskergen jón», - dedi Memleket basshysy.