Búgin belgili jazýshy Asqar Súleımenovtiń týǵan kúni
Tiri bolǵanda jazýshy 78 jasqa tolar edi.
Asqar Súleımenov 1938 jyly Ońtústik Qazaqstan oblysynda týǵan. Abaı atyndaǵy qazaq pedagogıkalyq ınstıtýtyn jáne aspırantýrasyn bitirgen. «Juldyz», «Parasat» jýrnaldarynda, «Qazaqfılm» kınostýdııasynda, Qazaqstan Jazýshylar odaǵynda, M.Áýezov atyndaǵy Qazaq akademııalyq drama teatrda qyzmet etken. Onyń «Besin», «Adasqaq», «Besatar» prozalyq shyǵarmalary, «Arǵymaq pen shabandoz», «Kek» dramalyq jınaǵy, «Parasat padıshasy», «Bolmyspen betpe-bet» synı-estetıkalyq eńbekteri, ádebıet pen óner týrasynda júzden astam maqalalary jaryq kórgen.
A.Súleımenovtiń «Besin» kitaby týraly Ǵabıt Músirepov «Jańasha jazýshy, jazýǵa jańalyq kirgizer jazýshy kele jatyr. Tek Asqardy sydyrtyp oqymaı, ishke túıe oqý kerek», dep maqala jazǵan. Jazýshynyń 1916 jylǵy ult-azattyq qozǵalys pen Sozaq kóterilisi týraly «Besatar» povesin de ádebıetshiler joǵary baǵalaǵan. Sońǵy jaryq kórgen «Shashylyp túsken tirkesteri» de qoǵamda rezonans týdyrǵan shyǵarma boldy. Jazýshy 1992 jyly aýrýhanada kóz jumdy.
Asqar Súleımenovtiń esimi Sozaq aýdanyndaǵy ózi oqyǵan mektepke, Saryaǵash qalasyndaǵy burynǵy Ilıch atyndaǵy mektepke berilgen. 2011 jyly Sozaq aýdanyndaǵy A.Súleımenov mektebine jazýshynyń eskertkishi ornatyldy.