Búgin Baıqońyrda zymyrandar ushpaıtyn qaraly kún

BAIQOŃYR. QazAqparat - Búgin - Baıqońyrda «Zymyrandar ushpaıtyn kún», ıaǵnı ǵarysh aılaǵynda qaza bolǵandardy eske alý kúni, dep habarlaıdy «QazAqparat» HAA tilshisi.

1960 jylǵy 24 qazanda ushyrylym aldyndaǵy jumystar júrip jatqan R-16 ballıstıkalyq zymyranda jarylys boldy. Zymyrandy ushýǵa daıyndap jatqan áskerıler, mamandar - jalpy 76 adam qaıǵyly oqıǵadan qaza tapty. Taǵy 49 adamdy kúıik shalyp, onyń da kópshiligi aýrýhanada jan tapsyrdy.

1963 jylǵy 24 qazanda ǵarysh aılaǵynda taǵy da tragedııa boldy. «R-9A» qurlyqaralyq ballıstıkalyq zymyranyn synaqtan ótkizý kezinde, janarmaı quıylǵan zymyrannyń shahtalyq-iske qosý qurylǵysynda órt shyǵyp, 8 adam mert boldy. Sodan beri 24 qazan «Baıqońyr» ǵarysh aılaǵynda Qaraly kún retinde belgilengen.

Bul kúni ǵarysh aılaǵynyń ushyrylym keshenderi men alańdarynda búkil jumys toqtatylyp, qala turǵyndary men qonaqtary Baýyrlastar zıratyna baryp, apattan qaza tapqandardy eske alady.

Búgin 1960 jáne 1963 jyldary ǵaryshtyq-zymyran tehnıkalaryn synaqtan ótkizý kezinde ajal qushqan zymyranshylarǵa ornatylǵan memorıaldyń aldynda jalpyqalalyq mıtıng ótti. Oǵan Ǵarysh kesheniniń basshylary, «Qazǵarysh», «Roskosmos» mamandary, qaladaǵy kásiporyndardyń qyzmetkerleri, oqýshylar, stýdentter, sondaı-aq turǵyndar jınaldy.