Búgin Astana keshteri HI halyqaralyq óner festıvali bastalady

NUR-SULTAN. QazAqparat - Jyl saıynǵy «Astana keshteri» halyqaralyq óner festıvali aıasynda 30 mamyr men 4 maýsym aralyǵynda 4 kontsert qoıylady. Olar «Astana opera» men «Astana balet» teatrlarynda ótedi, dep habarlaıdy QazAqparat festıvaldiń baspasóz qyzmetine silteme jasap.

«Joba aıasynda kórermender klassıka, halyq, estrada mýzykasyn Qazaqstanǵa jáne barsha álemge tanytyp júrgen úzdik oryndaýshylardyń ónerin tegin tamashalaı alady. Festıvaldiń qonaqtary álemdik sahnalardy baǵyndyrǵan óner juldyzdary bolǵanyna qaramastan, kontsertterge barlyq bıletter tegin taratylady. Festıvaldiń erekshe qonaqtary – múmkindigi shekteýli jandar», - delingen málimdemede.

Alǵashqy kontsert 30 mamyr kúni saǵat 19:00-de «Astana operanyń» kameralyq zalynda ótedi. Kórermender belgili kompozıtor Per Tıllýanyń (Frantsııa) shyǵarmashylyq keshin tamashalaı alady. Kontsertke qatysýshylar: Tımýr Ýrmancheev, fortepıano (Qazaqstan), Anna Serova, alt (Italııa), Kventın Fogel, skrıpka (Frantsııa), Sholpan Mankeeva, skrıpka (Qazaqstan), Aıgerım Ersaınova-Shýster, qobyz (Frantsııa), Mýrat Narbekov, vıolonchel (Qazaqstan), Dına Mırmanova, fortepıano (Qazaqstan).

«Astana balet» teatrynda 2 maýsym kúni saǵat 19:00-de ótetin kontsertte Berlınniń kontserttik orkestriniń solısi, vıolonchelıst Edgar Moro óner kórsetedi. Kontserttiń dırıjeri – maestro Faýsto Fýngarollı. Álemge tanylǵan mýzykanttar Motsart pen Gaıdnnyń úzdik týyndylaryn oryndaıdy.

3 maýsym kúni Berlınniń kontserttik orkestriniń solısi, fortepıano sheberi Vadım Holodenko jańa kontsertin usynady. Álemge jyldamdyǵy jáne tehnıkalyq sheberligi erekshe mýzykanttardyń biri retinde tanylǵan Vadım Holodenko Motsarttyń fortepıanoǵa arnalǵan ataqty shyǵarmalarymen qýantady.

«Rok mýzykasynyń altyn hıtteri» atty úlken gala-kontsert 4 maýsym kúni saǵat 18:00-de «Astana balettiń» sahnasynda ótedi. Arnaıy shaqyrylǵan solıster Iogan Bodıng (Shvetsııa), Sımone Romanato (Italııa) Queen, Beatles, Kiss, Pink Floyd, Metallica, Scorpions, Led Zeppelin, Europe jáne basqa da ataqty hıtterdi oryndaıdy. Kontserttiń dırıjeri – belgili kompozıtor Roberto Molınellı.

«Óner súıer qaýymǵa zor qýanysh syılaıtyn halyqaralyq festıvaldiń uıymdastyrýshysy – Nur-Sultan qalasy ákimdiginiń qoldaýymen «Degdar» gýmanıtarlyq qory. Bıletterdi tegin alý úshin [phone] nómirine habarlasýǵa bolady«, - deıdi uıymdastyrýshylar.

Aıta ketsek, «Astana keshteri» festıvali elimizde 2012 jyldan beri jyl saıyn ótkizilip keledi. Festıval mýzykalyq ónerdiń san túrli janrlaryn biriktiretin erekshe kontseptsııanyń arqasynda elimizdiń mádenı ómirindegi ıgi dástúrge aınaldy.

Sondaı-aq, 1 maýsym astanada respýblıkalyq balalar festıvali ótedi.