Búgin Astana qalalyq jáne aýdandyq jastar máslıhattaryna jańadan saılanǵan depýtattar resmı túrde qyzmetterine kiristi
Qalalyq jáne aýdandyq jastar máslıhattarynyń 4-shi shaqyrylymyna saılaý ústimizdegi jylǵy aqpan aıynyń 28-i kúni, Astanadaǵy 35 bilim berý mekemesinde ótti. Qalalyq saılaý komıssııasyna barlyǵy 207 kandıdat tirkeldi, saılaýǵa qatysýshylardyń sany 35 myń adam boldy. Nátıjesinde 45 jas qalalyq, 35 - Saryarqa aýdandyq, 28 - Almaty jáne 9 - Esil aýdandyq máslıhattaryna saılandy.
Astana qalalyq jastar máslıhaty tóraǵasynyń birinshi orynbasary Damır Berikǵazınovtyń aıtýynsha, máslıhattyń 4-shi shaqyrylymyn quraǵandardyń 63 paıyzy joǵary oqý oryndarynda, 29 - orta bilim berý mekemelerinde jáne 8 paıyzy - kásibı-tehnıkalyq lıtseılerde oqıdy.
Jas depýtattardy quttyqtap, olarǵa kýálikter men keýde belgilerin saltanatty túrde tabys etken QR Parlamenti Májilisiniń depýtaty Baqyt Syzdyqova, bul jolǵy saılaýǵa qatysýǵa nıet bildirgen kandıdattardyń sany jyldaǵydan erekshe kóp bolǵanyn atap ótti. «Biz Májiliske saılanǵan ýaqytta kandıdattardyń sany mundaı kóp bolǵan joq», - dedi ol.
Sondaı-aq ol, keleshekte jastar máslıhatynan tek stýdentterdi ǵana emes, jumys istep júrgen azamattardy da kórgisi keletinin jetkizdi.
Aıta keteıik, Astana qalasynda jastar máslıhaty 2007 jyldan bastap jumys isteı bastady. Máslıhattyń І-shi shaqyrylymy 28 adamnan quraldy.