Búgin Almaty qalasynyń qurmetti azamaty atanǵandar kimder

Almaty turǵyndary men qonaqtary qala kúnin atap ótip jatyr. Bul kún qyrkúıektiń úshinshi jeksenbisine belgilengen. Dástúr boıynsha túrli is-sharalar uıymdastyryldy, dep habarlaıdy QazAqparat tilshisi.

Mereke Abaı alańyndaǵy «Almaty júregimde» halyqaralyq baıqaýynan bastaldy, onda shahar basshysy Erbolat Dosaev almatylyqtardy qala kúnimen quttyqtady.

«Almaty – Qazaqstan táýelsizdiginiń altyn besigi, elimizdiń jańa tarıhy bastalǵan qala. Bizdiń qalamyzdyń basty qundylyǵy – sizder, Almaty turǵyndary. Sizder qalany kórkeıtip, alýan túrli jáne qonaqjaı etesiz. Osy erekshe kúni megapolıstiń damýyna úlesin qosqan ár almatylyqqa alǵys bildiremin», - dedi ákim.

Qala basshysy Almatynyń damýyna, órkendeýine úles qosqan 10 turǵyndy «Almaty qalasynyń Qurmetti azamaty» ataǵymen marapattady. Olardyń qataryna ǵalym, dáriger, sýretshi, qoǵam qaıratkerleri bar. Atap aıtqanda:

- «Dos-Muqasan» aty ańyzǵa aınalǵan vokaldy-aspapty ansambli, marapatty Murat Qusaıynov qabyldap aldy;

- Orazaq Ismaǵulov – kórnekti antropolog ǵalym;

- Alpysbaı Qazǵulov – belgili sýretshi, «Qazaqstan Sýretshiler odaǵy» RQB múshesi;

- Jánııa Áýbákirova – Qazaqstannyń halyq ártisi;

- Murat Abdýshýkýrov – qoǵam qaıratkeri, «Aýǵanstandaǵy soǵys ardagerleri men múgedekteri qoǵamdyq birlestikteriniń úılestirý keńesi» QB tóraǵasy;

- Sát Toqpaqbaev – memleket jáne saıası qaıratker;

- Ǵahıp Ýálıev – QR UǴA akademıgi;

- Asqar Jumadildaev – ǵalym-matematık, QR UǴA akademıgi;

- Quralbek Ordabaev – QR eńbek sińirgen jattyqtyrýshysy, sport ardageri, fýtbolshy;

- Záýresh Amanjolova – akýsherlik, gınekologııa jáne perınatologııa ǵylymı ortalyǵy» AQ dırektorlar keńesiniń tóraıymy.

Іs-sharanyń resmı bóligi aıaqtalǵannan keıin Tuńǵysh Prezıdent saıabaǵynda «Alma Fest» festıvali ótti. Munda «shóp dıirmeni» taqyryptyq qondyrǵysy ornatyldy. Alma jármeńkesine 45 sharýashylyq 125 tonna jemis ákeldi, onda merekeniń ár qonaǵy ózine unaǵan alma sortynyń dámin tatyp kórdi. Qala turǵyndary men qonaqtary úshin fýd-korttar, fotoaımaqtar, balalar bólmesi, sport jáne ashyq kıno kórýge arnalǵan alańdar uıymdastarylǵan.

Al, arbatta «Artbat Fest» zamanaýı óner festıvali ótti. Erekshe óner nysandarynyń arqasynda aýmaq naǵyz ashyq galereıaǵa aınaldy. Sondaı-aq, Panfılov kóshesinde «Týǵan kúnińmen, Almaty!» festıvali aıasynda kóptegen taqyryptyq alańdar uıymdastyryldy.