Býdapeshtte Abaı kúni atalyp ótti
Saltanatty is-sharaǵa Majarstan Syrtqy ister mınıstrligi Reseı jáne Ortalyq Azııa departamentiniń dırektory Gabor Nad, Túrki memleketteri uıymynyń Bas hatshysy Kýbanychbek Omýralıev, TúrkPA Bas hatshysy Mehmet Er Sýrreıa, Halyqaralyq túrki akademııasynyń prezıdenti Shahın Mýstafaev, TÚRKSOI Bas hatshysy Sýltan Raev, TMU Býdapesht qalasyndaǵy Eýropa ókildiginiń basshysy Ishtvan Vasharı, Majar jazýshylar odaǵynyń tóraıymy Kınga Erósh, «Barys» majar-qazaq qorynyń tóraǵasy Andrash Gal, Majarstanda turatyn otandastar men stýdentter qatysty.
Elimizdiń Majarstandaǵy Elshisi Abzal Saparbekuly óziniń alǵy sózinde jınalǵandardy mən-mańyzy joǵary, rýhanı merekemen shyn júrekten quttyqtap ótti.
Dıplomat Memleket basshysynyń sheshimimen 10 tamyz «Abaı kúni» dep belgilenip, hákim Abaı tek qana Qazaqstanda ǵana emes, sondaı-aq shet elderde de eske alynyp, túrli mádenı is-sharalarmen atalyp ótiletin jetkizdi.
Elshi, Shandor Petófı majarlar úshin qandaı uly aqyn bolsa, Abaı da qazaq halqy úshin kemeńger, óziniń tarıhı izin qaldyrǵan uly tulǵa ekenin baıandap berdi.
Majar jazýshylar odaǵynyń tóraıymy Kınga Erósh óz kezeginde Abaı eskertkishiniń Býdapesht tórinde ornatylǵanyna 10 jyl tolǵanyn atap ótip, Uly daladan shyqqan dara perzenttiń óleńderi adamgershilik pen parasatqa toly ekenin aıtty. Sóziniń sońynda uly aqynnyń «Ǵylym tappaı maqtanba» atty óleńin majar tilinde aıtyp, óleńderiniń adamgershilik pen gýmanızm turǵysynan mańyzyn erekshe atap ótti.
TMU men TÚRKSOI bas hatshylary Kýbynychbek Omýralıev pen Sýltan Raev qazaq dese birden Abaı, Abaı dese birden qazaq halqy eske túsetinin, onyń mol murasy tek qazaq halqynyń emes, kúlli adamzattyń, túrki áleminiń rýhanı nári ekenin aıtty.
Іs-shara sońynda Abaıdyń óleńderi qazaq jáne majar tilderinde mánerlep oqylyp, «Kózimniń qarasy» áni majar halqynyń tanymal qońyr úndi ánshisi Tamash Palchonyń oryndaýynda usynyldy.