Budan bylaı kóppáterli úıler «Bir úı-bir birlestik-bir shot» qaǵıdatymen basqarylady

NUR-SULTAN. QazAqparat - Turǵyn úı zańnamasyn jetildirý boıynsha túzetýler ótken jyldyń sońynda qabyldandy jáne bıylǵy 7 qańtarda kúshine endi. Bul týraly QR Indýstrııa jáne ınfraqurylymdyq damý mınıstrliginiń 2019 jyldyń qorytyndylary men 2020 jylǵy mindetterge arnalǵan keńeıtilgen alqa májilisinde aıtyldy, dep habarlaıdy QazAqparat tilshisi.

«2019 jyly turǵyn úı zańnamasyn jetildirý boıynsha aýqymdy jumys júrgizildi. Ázirlengen túzetýler ótken jyldyń sońynda qabyldandy jáne 7 qańtarda kúshine endi», - deıdi QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev.

Onyń aıtýynsha, zańnamalyq deńgeıde kóppáterli úılerdi basqarýda «Bir úı – bir birlestik – bir shot» qaǵıdaty boıynsha «múliktiń menshik ıeleri birlestigi» kommertsııalyq emes uıymyn qurýdyń jańa nysany kózdelgen.

«Turǵyn úıdi odan ári kúrdeli jóndeý úshin jınaq júıesi engizildi (0,005 AEK - 1 sharshy metr úshin 13,3 teńge). Basqarý organdarynyń qyzmeti ashyq júrgiziledi, sondaı-aq basqarý organdaryn menshik ıeleri tarapynan baqylaý jáne áleýmettik ınfraqurylym obektilerindegi qaýipti tehnıkalyq qurylǵylardy, gaz jáne gazben jabdyqtaý obektilerin qaýipsiz paıdalaný normalary kózdelgen. Turǵyn úı jáne turǵyn úı-qurylys kooperatıvteriniń qyzmeti rettelgen jáne quraldardy satyp alý ashyq júrgiziledi», - deıdi ol.