Budan bylaı qaı óńirde qaı sport túri damytylatynyn mınıstrlik sheshedi

<p>Sport jáne dene shynyqtyrý komıteti tóraǵasynyń orynbasary Aıgúl Bektenova ortalyq kommýnıkatsııalar qyzmetinde ótken brıfıngide olımpıadalyq sport túrlerin damytýdyń tártibi ózgeretinin aıtty, dep habarlaıdy Kazinform.</p>

«Nege elimizde medal eń kóp sarapqa salynatyn sport túrlerin damytpasqa? Tóńireginde únemi daý-damaı bolyp jatatynyna qaramastan, qarjylandyrylatyn sport túrleriniń tiziminde aýyr atletıka basymdyqqa ıe?» - dep surady jýrnalıst.

Aıgúl Bektenova osy baǵytta jumystar endi qolǵa alynyp jatqanyn aıtady.

«Qazir medal kóp sarapqa salynatyn jáne tirek sport túrleriniń máselesi pysyqtalyp jatyr. Búginde zań jobasy ázirlendi, buǵan deıin ár óńir qaı sport túrin damytatynyn ózi sheshetin. Ár óńir 55-ten 100-deıin sport túrin damytatyn. Tipti olardyń ishinde olımpıadalyq, paralımpıadalyq, sýrdolımpıadalyq, azııalyq oıyndardyń baǵdarlamasyna kirmeıtin túrler de bolǵan. Sáıkesinshe, halyqaralyq ımıdjge de áseri bolmaıdy. Sondyqtan bul quzyretti ózimizge alyp otyrmyz. Ár óńirde qandaı sport túrleri damytylatynyn klımat jaǵdaıyna qaraı aıqyndaımyz. 

Qazir bizde qaıshy tendentsııalar bar. Qysqy sportqa beıim soltústik óńirlerde halyqaralyq arenadaǵy jetistikter joq bolsa, ońtústik óńirlerde frıstaıl-akrobatıka sııaqty sport túrlerinen álem kýbogynyń júldeger, olımpıada oıyndarynyń besinshi oryny bar. Osyndaı qaıshy tendentsııalar bolmaýy úshin sport túrlerin damytýdy tártipke keltirgimiz keledi», - dedi Aıgúl Bektenova.