Býchadaǵy jaǵdaı: Reseı BUU Qaýipsizdik Keńesiniń otyrysyn shaqyrýdy talap etti

MÁSKEÝ. TASS-QazAqparat - Reseı tarapy Kıevtiń Býcha eldi mekeninde beıbit turǵyndardy óltirdi degen aıyptaýdy joqqa shyǵaryp, sol jerde túsirilgen fotolar men vıdeolardy «sahnalanǵan» dep atady. Dúısenbide Máskeý Býchadaǵy jaǵdaıǵa baılanysty BUU Qaýipsizdik keńesiniń otyrysyn shaqyrýdy talap etti. Bul týraly jeksenbi kúni Reseı qorǵanys mınıstrliginen málimdedi, dep habarlaıdy QazAqparat TASS agenttigine silteme jasap.

Qaqtyǵys barysy

Reseı Ýkraınadaǵy operatsııanyń barlyq maqsattaryna jetedi, dedi jeksenbi kúni «Máskeý. Kreml. Pýtın» baǵdarlamasy barysynda RF prezıdentiniń baspasóz hatshysy Dmıtrıı Peskov. Ol onyń aldynda «Belarýs-24» telearnasyna bergen suhbatynda Ýkraınany demılıtarızatsııalaý «qarqyndy túrde júrip jatyr» dep aıtqan.

RF Qorǵanys mınıstrliginiń málimetinshe, demalys kúnderi Reseı áskerıleri dál basqarylatyn qarýlarmen Poltava men Dneprdegi aerodromdardy jaramsyz etti, sondaı-aq Odessa mańyndaǵy munaı óńdeý zaýyty men úsh janarmaı qoımasyn qıratty. Kıev oblysyndaǵy aerodromǵa jasalǵan soqqy Ýkraınanyń avıatsııalyq jáne áýe qorǵanys kúshterin eskertý jáne baqylaý ortalyǵyn isten shyǵardy, dep qosyp ótti vedomstvodan.

Máskeýge qarsy jańa sanktsııalar jáne Kıevti qarý-jaraqpen qamtamasyz etý

Batysta Reseıge qarsy sanktsııalardy kúsheıtý týraly aıtylp jatyr. Eýropanyń Ekonomıka jónindegi komıssary Paolo Djentılonıdiń aıtýynsha, EO energetıkalyq sektorǵa áser etpeıtin jáne shekteýlerdi aınalyp ótý qıyn bolatyndaı oılastyrylǵan jańa sharalar qarastyrýda. Germanııa bıligi dúısenbiden bastap sanktsııalardy kúsheıtý máselesin talqylaı bastaýdy kózdep otyr. Germanııa kantsleri Olaf Sholtstiń aıtýynsha, Berlın Ýkraınany da qarý-jaraqpen qamtamasyz etýdi jalǵastyrady. Ulybrıtanııa da Reseıge qarsy sanktsııalardy kúsheıtip, Ýkraınaǵa áskerı kómekti arttyrýǵa nıetti.

AQSh Kıevke taǵy 300 mln dollar kóleminde áskerı kómek kórsetedi (Reseı operatsııasy bastalǵannan beri 1,6 mrd dollardan astam qarjy bóldi). Atap aıtqanda, lazermen basqarylatyn zymyrandyq júıeler, Switchblade snarıadtary jáne ushqyshsyz basqarylatyn Puma bar.

Sonymen birge Vashıngton Kıevtiń qarý-jaraq alýyn qamtamasyz etý úshin dúnıe júzindegi eldermen jumys júrgizýde, dedi CNN telearnasyna bergen suhbatynda AQSh memlekettik hatshysy Entonı Blınken. The New York Times gazetiniń AQSh ákimshiligindegi derekkózine silteme jasap habarlaýynsha, AQSh Ýkraınaǵa Keńes Odaǵy shyǵarǵan tankterdi ótkizýge jaǵdaı jasaıdy.