BTA top-menedjeriniń úı kútýshisi mıllıardtaǵan nesıeni qalaı aldy

ALMATY. QazAqparat - Almaty qalasynyń mamandandyrylǵan aýdanaralyq sotynda Muhtar Áblıazovtiń jáne onyń sybaılastaryna qatysty qylmystyq is boıynsha sot tyńdaýy jalǵasyp jatyr.

Kezekti sot tyńdaýynda, «GlobaI Securities» JShS-yne nesıe berý arqyly BTA bankiniń qarjysy qalaı tonalǵany aıtyldy. Atalǵan JShS-nyń quryltaıshysy  brıtanııalyq, vırgınııalyq araldarda tirkelgen «Steffler Global Inc.» ofshorlyq kompanııasy. Tergeý málimetteri boıynsha, atalǵan offshorlyq kompanııanyń Qazaqstandaǵy ókili Áblıazovtiń stýdent kezinen tanysy Rıfat Rızoev bolǵan. 2005 jylǵy jeltoqsanda «GlobaI Securities JShS-nyń dırektorlyǵyna Veronıka Efımovanyń úı kútýshisi Elena Novıkova shartty túrde taǵaıyndalǵan. Aqsha jymqyrý kestesinde Novıkova shartty túrde dırektor retinde Áblıazovtiń baqylaýyndaǵy «Global Securities» kompanııasynda tek qol qoıyp qana otyrǵan.

Aıta ketý kerek, Veronıka Efımova sol ýaqytta «birkúndik» kompanııalarǵa nesıe resimdeýmen aınalysqan BTA bankiniń ÝKB №6 bólimine basshylyq etken. Atalǵan bólim Muhtar Áblıazovtyń baqylaýynda bolǵany belgili. Osylaısha, Áblıazov BTA Bankinen «Global Securities» JShS-na aqsha bólýdi tikeleı ózi qadaǵalap otyrǵan.

Osydan keıin, bank basshylyǵy Áblıazovtiń qatysýymen «Global Securities» JShS-ne 800 mln teńge nesıe berý týraly ótinishti qarastyryp, esh kedergisiz ony maquldaǵan.

Nesıe komıtetiniń músheleri kompanııany Áblıazov baqylaýynda ustap otyrǵanyn bilgendikten nesıe týraly ótinishti qanaǵattandyrǵan. Resimdeý protsedýralarynan keıin qarajat qaryz alýshynyń shotyna aýdarylǵan.

«Global Securities» JShS arqyly aqsha urlaý munymen aıaqtalmaǵan.

Úsh aıdan keıin Elena Novıkovanyń atynan BTA bankine 1 jyldyq merzimmen kompanııanyń jeke aınalymyn toltyrý degen syltaýmen 3,4 mlrd teńge nesıe alý týraly ótinish kelip túsken. Alǵashqy joly berilgendeı bank basshylyǵy bul joly da esh kedergisiz qarjy aýdarý týraly sheshim qabyldaǵan.

Budan bólek, nesıe komıteti otyrysynyń hattamasyna syrttaı qol qoıylǵan.  Naqtyraq aıtqanda, «Global Securities» JShS-nyń ótinishi nesıe komıtetiniń qaraýynda talqylanbaǵan. Alaıda, suraý paraǵy syrttaı toltyrylǵan. Atalǵan qarajat aýdarylǵannan keıin Novıkavaǵa aqshanyń barlyǵyn Áblıazovtiń tolyq baqylýyndaǵy «TýranAlem Sekıýrıtıs» kompanııasyna aýdarý týraly nusqaý bolǵan.

Osylaısha, qarjylyq operatsııalar arqyly urlanǵan qarajatty Áblıazov pen onyń sybaılastary ózderi ıemdengen.