BTA banktiń basshylyǵy óz qyzmetkerlerin ádilettilikten jasyryný úshin Qazaqstannan ketýge májbúrlegen
«2001 jyly 31 qańtarda Jarymbetov (BTA banktiń basqarma tóraǵasynyń orynbasary - nesıe berý komıtetiniń tóraǵasy) meni óz úıine shaqyryp, bankten jumystan ketýime úgittedi. Ol sondaı-aq elden tezdetip ketýdi usyndy. Óz usynysyn ol bankke memlekettiń kirýimen jáne óziniń qyzmetten shettetilýimen, sondaı-aq, óziniń jáne basqa da qyzmetkerlerdiń tutqyndalý múmkin ekendigimen túsindirdi. Atap aıtarlyǵy, ol kezde meniń elden ketý kerek degen oıym bolǵan joq»,- dedi sottalýshy.
Ol óz qyzmetin nomınaldy túrde atqarǵanyn málim etti. Barlyq jaǵdaıda tek basshylyqtyń nusqaýyn oryndaǵanyn aıtty.
«2 aqpanda men Bishkekke kettim. 3 aqpanda Jaqsylyq Jarymbetovpen birge Máskeýge attandyq. Ol jerde 2009 jyldyń 19 naýryzyna deıin boldyq. Máskeýde júrgende J. Jarymbetov maǵan banktiń basqa qyzmetkerlerimen kezdesip, birlesip áreket etýdi usyndy»,- dedi Qaırat Sadyqov.
Sottalýshy óz sózinde odan áride banktiń qashqyn qyzmetkerlerine naqty nusqaýlar berilip otyrǵanyn aıtty.
«Banktiń burynǵy jetekshileri men qazaqstandyq advokattar eger biz Qazaqstanǵa qaıtap oralatyn bolsaq, túrmege qamalatynymyzdy uzaq ýaqytqa sottalatynymyzdy aıtýmen boldy. Sol advokattar Máskeýde qalýymyzdyń da qaýipti ekenin eskertip, sol sebepten Ýkraınaǵa ketýge keńes berdi»,- dedi ol.
Kóp uzamaı 2009 jyly 20 naýryzda ol Kıevke barady. Sol qalada 2016 jyly 9 maýsymǵa deıin, ıaǵnı, Qazaqstanǵa oralǵansha turypty.
«Banktiń burynǵy basshylyǵy maǵan 2011 jyldyń jeltoqsan aıyna deıin materıaldyq kómek kórsetip otyrdy»,- dedi sottalýshy. Shyndyǵyna kelgende 2009 jylǵy oqıǵalardan keıin Q. Sadyqov basqa qashqyndarmen qatar BTA bankten 10 myń AQSh dollary kóleminde aı saıyn jalaqy alyp turǵan. Oǵan qosa, bank qashqyndardyń turǵyn úıleriniń jaldaý aqysyn da tólep otyrǵan. Muhtar Ábilázovke mundaı sheshimdi qabyldaýǵa Muratbek Ketebaevtyń usynysy sebep bolypty. Aıtarlyǵy, 2012 jylǵa deıin qashqyn qyzmetkerlerine aqsha tólegen Muhtar Ábilázov «olar óziniń mıssııasyn atqardy» dep uıǵarym jasap, aqsha tóleýdi toqtatqan.
Aıta ketelik, sottalýshylar oryndyǵynda úsh adam otyr: olar BTA banktiń burynǵy basqarma tóraǵasy Sadýaqas Mámesh, basqarma tóraǵasynyń birinshi orynbasary - nesıe berý komıtetiniń tóraǵasy Jaqsylyq Jarymbetov, nesıe berý jónindegi dırektor Qaırat Sadyqov. Muhtar Ábilázovtiń ózi sotqa kelgen joq. Onyń múddesin sotta memlekettik qorǵaýshy Anjelıka Ájiǵulova qorǵaıdy.
Aǵymdaǵy jyldyń 3-inshi sáýirinde bastalǵan basty sot otyrysyna Almaty qalasyndaǵy qylmystyq ister jónindegi mamandandyrylǵan aýdanaralyq sottyń tóraǵasy Martbek Kákimjanov tóraǵalyq etýde. Sot otyrystaryna úsh memlekettik aıyptaýshy, sottalýshylardyń qorǵaýshylary jáne BTA bankiniń ókili qatysýda. Qylmystyq istiń jalpy kólemi 2 224 tomnan turady. Aıyptaýshylar tiziminde 200-den astam kýágerler bar.