BTA banktegi nesıe berý týraly sheshimder formaldy túrde júzege asyrylǵan

ASTANA. QazAqparat - Almaty qalasynyń qylmystyq ister jónindegi mamandandyrylǵan aýdanaralyq sotynda qashqyn bankır Muhtar Ábilázov pen onyń sybaılastarynyń qylmystyq isi boıynsha basty sot otyrysy jalǵasyp jatyr. Búgingi sot otyrysynda sotqa jaýap bergen BTA banktiń nesıeleý jónindegi basqarmasynyń burynǵy basqarýshy dırektory Gúlnara Tileýqulova banktegi nesıe berý týraly sheshimder formaldy túrde júzege asyrylǵanyn habarlady. Onyń aıtýynsha, nesıe komıtetiniń músheleriniń eshqaısysy usynylǵan qujattardyń durystylyǵyn teksere almaǵan.

Kýáger sottaǵy jaýabynda banktiń nesıeleý bólimine tikeleı Muhtar Ábilázovtiń ózi qatań baqylaý jasaǵanyn áńgimeledi. Sol sebepten banktiń qyzmetkerleri birneshe mıllıondaǵan nesıelerdi alýǵa ótinishterdi toltyrǵanda eshteńege de basyn qatyrmaǵan. Sonymen qatar, nesıe komıtetiniń músheleriniń eshqaısysy qaryz alýshylardyń ókilderimen baılanys ornatpaǵan. Buǵan qosa, nesıe berýdegi táýekelder de baǵalanbaǵan, ol týraly eshqandaı aqparat suralmaǵan.

«Óıtkeni atalǵan kompanııalardy qarjylandyrý jáne qarjylandyrý talaptaryn ózgertý týraly barlyq sheshimderdi Muhtar Ábilázov ózi ǵana shyǵaratyn. Nesıelerdi berý týraly formaldy túrde sheshimder shyǵarylyp otyrdy. Al nesıe komıtetiniń músheleri bul kompanııalardyń artynda Muhtar Ábilázovtiń ózi turǵanyn bilgendikten, barlyq ótinishterdi birden maquldap otyrdy»,- dep túsindirdi istiń aq-qarasyn kýáger.

Atap aıtarlyǵy, keıbir jaǵdaıda nesıe berý týraly sheshimder syrttaı shyǵarylyp otyrǵan. Mundaı jaǵdaıda nesıe komıteti músheleriniń úshten biriniń daýysy jetkilikti bolǵan. Saıyp kelgende, mundaı mehanızm Muhtar Ábilázovke offshorlyq aımaqtaǵy óziniń qaramaǵyndaǵy negizgi kompanııaǵa baǵynyshty enshiles kompanııalarǵa esh kedergisiz nesıeler berýge jol ashqan. Týra osyndaı tásilmen Máskeýdegi jáne Belgradtaǵy qurylys nysandarynyń jobasy qarjylandyrylǵany málim boldy. Alaıda barlyq qaryzdar tolyǵymen qaıtarylmaǵan kúıinde qalyp kelgen.

Gúlnara Tileýqulova óz sózinde nesıe komıtetiniń otyrystary eshqashan ótkizilmegenin ashyq aıtty. «Óıtkeni Muhtar Ábilázovtiń nusqaýlary birden oryndalatyn edi. Banktiń ishki kóptegen protsedýralarynda zań buzýshylyqtar kóp bolatyn, biraq eshkim oǵan nazar aýdarmaıtyn»,-dep jalǵastyrdy sottaǵy sózin kýáger. Ol sondaı-aq zańsyz nesıelerdi berýmen aınalysqan №6 korporatıvtik bıznes basqarmasynyń jumysyna  BTA banktiń basqarma tóraǵasynyń orynbasary Jaqsylyq Jarymbetov, nesıeleý jónindegi dırektor Qaırat Sadyqov jáne №6 korporatıvtik bıznes basqarmasynyń basshysy Veronıka Efımovalar baqylaý jasaǵanyn da jasyrmaı aıtty. «Bul basqarmanyń esigi únemi jabyq bolatyn. 14-shi qabatta ornalasqan qurylymǵa eshkim kire basyn suǵa almaıtyn»,-dedi Gúlnara Tileýqulova. Aıtpaqshy, kýáger sot otyrysynda sotqa deıingi tergeýge bergen túsinikterin de rastady.

Buǵan deıingi sot otyrystarynda sotqa túsinik bergen kýágerler birneshe mıllıondaǵan qaryz berilgen offshorlyq kompanııalar BTA banktiń qyzmetkerleriniń atyna, sonyń ishinde №6 korporatıvtik bıznes basqarmasynyń qyzmetkerleriniń atyna tirkelgenin málimdegen bolatyn. Bul basqarma qaryz alýshy kompanııalardyń qujattaryn daıyndaýmen aınalysqan.